Estatutu Funsionáriu CI nian Diskuti iha KFP

Díli – Conselho de Imprensa de Timor-Leste (CI), hala’o diskusaun ho Komisaun Funsaun Públika (KFP), hodi diskuti kona-ba estatutu funsionáriu CI nian ne’ebé oras ne’e dadaun hanesan hela Ajente Administrasaun Públika.

Diskusaun estatutu funsionáriu CI nian, realiza iha loron segunda-feira, 03/09/2019, iha salaun enkontru Komisaun Funsaun Públika, Matadoru, Díli. Ekipa CI nian lidera direta hosi Prezidente CI, Virgílio da Silva Guterres, akompaña hosi membru sira, Diretora Ezekutiva ho nia estrutura inklui Fiskal Úniku, entretantu KFP lidera direta mós hosi Prezidente KFP, Faustino Cardoso no akompaña mós hosi nia membru sira.

Iha introdusaun, Prezidente Conselho de Imprensa, Virgílio da Silva Guterres hatete bainhira establese CI, hahú halo rekrutamentu ba funsiunáriu sira tuir rekezitus sira funsaun públika nian hodi konsidera nu’udar ajente administrasaun públika.

Prezidente dehan tuir estatutu CI nian katak Conselho de Imprensa bele iha nia funsionáriu rasik, nomós bele hetan apoiu hosi funsionáriu sira hanesan destakadu ba CI.

Ho situasaun sira ne’e, Ci hakarak kompartilla ho KFP katak “Primeiru, rona nomós hetan hanoin ruma kona-ba ba oin ne’e Ajente administrasaun ne’e kompativel nafatin ho ami nia funsionamentu ba oin ka presiza halo ajustamentu ruma ho ami nia kuadru legal”.

“kona-ba prosesu destaka funsionariu sira ba ne’e, ninia prosedimentus sira ne’e, presiza ami mós hetan informasaun hosi komisaun funsaun públika,” hatete prezidente CI, Virgílio Guterres iha sorumutu refere.

Entretantu, Prezidente KFP, Faustino Cardoso, hato’o apresiasaun ba inisiativa CI nian tanba prezenta CI nian signifikativu tebtebes.

“Imi nian tama kategoria ida naran administrasaun indireta ne’ebé goja autonomia finanseira administrativa no patrimoniál, ne’e hotu iha ámbitu desentralizasaun pur serbisu ho hanoin ida oinsa atu asegura efikásia no efisensia do serbisu,” dehan Faustino Cardoso.

Nia hatutan, regra funsaun públika katak labele automatikamente foti funsionáriu sira ne’ebé kontratadu ba funsionáriu permanente. Nia hatutan funsionáriu kontratadu hotu-hotu tenke liuhosi konkursu públiku maka bele sai funsionáriu públiku.

Tanba ne’e, funsionáriu sira CI nian ne’ebé oras ne’e dadaun kontratadu nu’udar ajente administrasaun públiku labele automatikamente foti sai nu’udar funsionáriu permanente.

Iha enkontru ne’e nia rohan, Prezidente CI, Virgílio da Silva Guterres hato’o agradese wa’in ba KFP tanba bele partilla ona informasaun lubuk nune’e Conselho de Imprensa bele uja nu’udar referensia hodi deside estatutu funsionáriu sira CI nian.


Imprimir   Email