CI Fasilita Estudante Kursu Integradu Estadu Maior ba Vizita Mídia sira

CI Fasilita Estudante Kursu Integradu Estadu Maior ba Vizita Mídia sira

Atividade Hare nain: 3740

Díli – Conselho de Imprensa de Timor-Leste (CI), fasilita estudante kursu Estadu Maior Konjunta no Integradu entre F-FDTL no PNTL hodi ba vizita instituisaun mídia eletrónika no imprime hodi buka hatene serbisu mídia nian.

Durante loron sorin, estudante Kursu Estadu Maior hamutuk na’in hat (4), inklui koordenador Kursu referee, konsege halo vizita ba Rádiu Televizaun Timor-Leste, Empreza Públika (RTTL,EP), Jornál Diária Timor Post, Grupo Média Nasionál (GMN) no Jornál Independente, iha sexta-feira (24/08).

Kursu Estadu Maior Konjunta no Integradu entre Falintil-Forsa Defeza Timor-Leste (F-FDTL) no Polísia Nasionál Timor-Leste (PNTL), realiza durante tinan ida, hahú hosi Fevereiru 2018 no sei ramata iha fulan fevereiru 2019, iha ne’ebé organiza hosi Institutu Defeza Nasionál (IDN).

IDN organiza Kursu Estadu Maior ho objetivu hodi prepara futuru lideres, future komandante nomós bele sai hanesan konselleiru ba superiores sira no mós iha instituisaun F-FDTL no PNTL nian.

Iha entrevista ho mídia sira, Diretora Ezekutiva CI, Ana Teresa Sequeira, hatete CI mós hetan sesaun ida kona-ba Komunikasaun sosiál, iha ne’ebé Prezidente CI no Membru sira fo ona material iha aula no mós halo vizita ba mídia sira.

“Programa Formasaun ne’e iha pakote ida, Conselho de Imprensa hetan sesaun ida kona-ba komunikasaun sosiál. Iha sesaun ne’e, iha mós teoria, depois de teoria, tun ba hare direitamente oinsá mídia nia serbisu iha terenu”, DE esplika.

Diretora dehan liuhosi vizita ne’e bele hametin liutan serbisu Mídia nian ho F-FDTL no PNTL liuiu bainhira hala’o knaar iha terenu nune’e labele hamosu tan dezentendimentu hosi parte jornalista no seguransa sira.

Entretantu, Koordenador Kursu Estadu Maior, Tenente Coronel, Alberto P. dos Santos, hatete IDN serbisu hamutuk ho CI hodi fó formasaun iha kursu estadu maior no ikus liu maka halo vizita ba mídia sira nu’udar parte ida hosi formasaun refere.

“Ami halo vizita ne’e tanba IDN serbisu hamutuk ho Conselho de Imprensa, Prezidente CI ho nia ekipa sira ba fó hela formasaun iha ne’ebá (IDN), entaun parte teórika sira liu tiha ona, agora ami mai vizita órgaun komunikasaun sosiál sira ka mídia sira”.

“Oinsá maka mídia sira hala’o informasaun iha terenu depois mai prosesu halo nusa no prosesu oinsá depois nia desiminasaun ba iha públiku”, Dehan Teneten Coronel Infantil, Alberto.

Tenente Coronel Infantil esplika iha prosesu aprendizajen, Conselho de Imprensa ne’ebé lidera hosi Prezidente CI, Virgílio da Silva Guterres, fó ona materia teoria sira kona-ba relasoens públikas no komunikasaun sosiál. 

Durante vizita, Tenente Coronel ,Alberto, hatete ba mídia sira katak liuhosi vizita referee bele hametin liutan serbisu hamutuk entre mídia ho F-FDTL no PNTL hodi hala’o serbisu hamutuk liuliu iha terenu hodi labele hamosu tan dezentendimentu hosi parte jornalista no seguransa.

Entretantu, Xefe Departamentu Informasaun Rádiu Timor-Leste (RTTL,EP), Markus Eko, esplika kona-ba lala’ok redasaun nian perante vizita partisipantes Kursu Estadu Maior iha sala redasaun RTL, Cai-Coli Dili.

Markus Eko dehan, normalmente serbisu mídia nian hanesan de’it, maibé iha diferensa maka polítika redasaun kada mídia nian hodi halo kobertura no halo notísia hodi hato’o ba públiku.

Liuhosi biban ne’e, Markus Eko husu ba F-FDTL no PNTL katak “ba oin, ami aproveita oportunidade para atu bele iha koordenasaun no kooperasaun atu nune’e fasilita jornalista sira atu hala’o sira nia serbisu iha terenu”. 

Iha visita ba mídia hirak ne’e partisipantes kursu husu perguntas barak kona-ba lalaok servisu iha redaksaun, oinsa asesu publiku atu hetan kobertura mídia, balansu kobertura inklui observa direta estudio radio no televizaun sira. (CI)