DILI, 15/08_Conselho de Imprensa de Timor-Leste, entrega sertifikadu ba partisipantes treinamentu journalizmu komprensivu durante fulan lima nia laran, hahu fulan marsu tinan ne’e ho partisipantes ema nain 26. Sertifikadu ne’e entrega husi Prezidente Conselho de Imprensa, Virgílio da Silva Guterres, hamutuk ho Reprezentante UN no UNDP iha TL, Roy Trivedy, Embaisador Japaun ba TL, Hiroshi Minami, inklui esturutura Conselho de Imprensa no UNDP, iha sala Ótel Novu Turismu Dili, quarta-feira (15/08).
Hafoin intrega sertifikadu, Prezidente Conselho de Imprensa, Virgílio da Silva Guterres, hatete graduasaun ne’e hanesan fase dauluk, tamba ne’e graduadu sira tenki buka aprende liu tan.
“Ba alin sira ne’ebé foun ida ne’e hanesan oportunidade ba alin sira, liu liu atu hili se tama duni iha vida jurnalizmu maka buat sira ne’e mak presija atu hili, maibe mós laos to’o iha ne’e deit mais buka atu aprende liu tan”, dehan Prezidente.
Virgílio fo parabens ba sira ne’ebé durante ne’e tuir treinamentu ikus mai hodi simu sertifikadu.
“ Atu hateten deit katak mundu Jornalismu ne’e laos iha fatin deit maibe nia dinamiku, tamba ne’e nia labele metin iha fatin maibe nia sempre muda tuir ambiente ne’ebé mak iha, tan ne’e kuandu iha mudansa ruma ne’ebé akontese ita boot sira tenki koko atu akapta tuir”
Tuir planu husi parte rua ne’e hetan ona konkordansia atu treinamentu ne’e sei iha kontinuasaun no mós sira ne’ebé dadaun simu sertifikadu ona ne’e sei kontinua iha nivel ida avansadu nian.
Reprezentante partisipantes, Delfina Castro dos Santos, agradese ba ajuda husi Povu Japaun liu husi servisu hamutuk entre UNDP ho Conselho de Imprensa, hodi implementa treinamentu ida ne’e.
“ ami rekomenda hela ba Embaisador Japaun mai Timor-Leste karik bele treinamentu ne’e kontinua ba oin nafatin”, dehan nia.
Nune’e mos, Reprezentante partisipantes, Mateus Barros, agradese no rekomenda ba Embaisador Japaun iha TL atu bele kontinua fo mós treinamentu jurnalista investigativu no data jornalizmu nian.
“ Tamba ami foin primeira ves tuir treinamentu kona-ba data jornalismu nian, tan ne’e se bele kontinua tan treinamentu ida ne’e atu ami nele hatene diak liu”, nia rekomenda.
Iha fatin hanesan, Reprezentante UN no UNDP iha Timor-Leste, Roy Trivedy, kongratula partisipantes sira ne’ebé kompleta ona treinamentu ne’e durante fulan lima.
“ Ha’u rekonhese no apresia imi nia komitmentu no esforsu hodi partisipasaun durante iha treinamentu, tamba ne’e ha’u hakasolok hare jurnalista foun nain 26 ne’ebé hetan benefisiu programa ida ne’e diak tebes, hodi reprezenta ona diferensia hotu iha nasaun ida ne’e nomos ajuda tranforma maluk jurnalista feto no mane sira”, dehan Roy Trivedy.
Nia parte mos fiar katak ho formasaun ne’ebé partisipantes sira hetan ona ne’e bele hasae konhesimentu liu liu husi teoria ba pratika nian.
“ Dala ida tan hau fiar katak imi bele adapta konhesimentu iha situasaun reál jenéru iha Timor Leste”, nia afirma.
Tuir nia, Nasaun ida ne’e nia idade sei jovens hanesan mos idade partisipantes sira nian, tamba ne’e Timor-Leste nia futuru iha partisipante sira nia kabas.
“Ha’u husu ba Imi hotu atu presija ejerse funsaun ho didiak nune’e bele asegura sosiedade ne’ebé livre no demokratiku”, nia aumenta
Nune’e mos Embaisador Japaun iha Timor Leste, Hiroshi Minami, fo nia parabens ba partisipantes inklui Conselho de Imprensa hamutuk ho treinador Nasionál no Internasionál sira ne’ebé hamutuk hodi fasilita treinamentu ida ne’e ona.
“ Ita tenki komprende didiak papel Mídia ninian liu liu papel Mídia iha Timor-Leste, no laos iha Timor-Leste deit maibe mos atu adapta iha mundu liu liu iha rejiaun ne’ebé Timor-Leste iha ba”, nia realsa.
Timor-Leste bele goja liberdade imprensa katak embaisador, “Timor-Leste sorti boot tamba sei bele goja ida ne’e maibe infelismente iha Nasaun sira seluk dala ruma la hanesan ho Timor Leste ona,” haktuir Hiroshi Minami.
“ Atualmente ita nia dezafius oin oin ne’ebé mak mosu iha Mundu ida agora dadauk liu liu ba notisia sira ne’ebé espalha iha ita nia leet, fake news sira ne’e, ou ita nia lee nain sira agora ne’e laiha ona pasensia atu lee ita nia notisia, Sira nia tempu okupadu liu sira la konsege lee ita nia notisia tamba ne’e ita tenki buka adapta ho situasaun ne’e”, nia realsa.
Embaisador ne’e mos protesta oituan oinsa importansia husi konhesimentu partisipantes sira nian, disiplina , profesionalizmu, ho integridade morál partisipantes sira nian nu’udar jornalista atu bele tetu hotu, analiza saida mak bele hasai ba publiku.