Dili, - “Depois de rekolla informasaun balun, Conselho de Imprensa hakarak hato’o preokupasaun konsekuénsia hosi empáse polítika ne’ebé la’o hosi 2017 to’o agora, liuliu konsekuénsia ne’ebé afeta diretamente ho mídia ka meius komunikasaun sosiál sira.” Ne’e mak introdusaun husi Prezidente CI, Virgílio da Silva Guterres, iha Konferénsia Imprensa ne’ebé hala’o iha edefísiu CI, Sesta (3/8). Prezidente CI hateten political deadlock ne’e ekonomikamente implika mós ba funsionamentu kanál mídia sira nia publikasaun iha railaran.
“Hakarak alerta ba públika nomós ukun nain sira katak konsekuénsia naruk ne’e dala ruma iha palásiu, iha parlamentu, iha uma laran ita ladun sente, maibé iha liur ami fiar katak populasaun barak mós hahú sente. Relasiona ho meius no orgaun komunikasaun sosiál ninian ami hakarak fó hatene katak mídia importante sira ne’ebé durante ne’e halo kobertura ba notisia, ba informasaun atu fó ba públika, ida-ida komesa hahú taka, tanba krizi finanseira ne’ebé sira infrenta,” informa Prezidente CI.
Prezidente CI hatutan, “iha mídia rua sira nia manajementu desidi atu taka, Timoroman ho Matadalan.”
Situasaun ne’e sai aat-liu tan mak jornál balun tenke hamenus númeru jornalista husi sira nia serbisu. “Tuir mai ami mos rona iha mídia importante sira, Manajementu Jornál Independente ne’ebé mai kompartilla informasaun katak selu saláriu ho cicil, rona mós hosi Timor Post katak hosi ema 70 resin hahú redus 20 tanba kestaun hanesan,” informa Prezidente CI.
Prezidente esplika katak, “ situasaun ne’e afeta tanba rendementu ba mídia sira ne’e hotu depende ba publisidade ne’ebé mai hosi Governu.”
Eis Prezidente AJTL ne’e hato’o mensajen ba ukun nain sira ne’ebe hola parte iha Governasaun tinan ida ne’e katak, “presiza tau iha konsiderasaun ba situasaun ida ne’e, ne’ebé ho situasaun ida ne’e atu bele dudu sira atu konsentra mobilija rekursu hodi buka solusaun no Conselho de Imprensa sei kontinua situasaun ida ne’e.”
Virgílio da Silva Guterres mós hato’o mensajen ba responsabel mídia nain sira atu estabelese komunikasaun ne’ebé di’ak liuliu atu esplika ba jornalista profisionál sira situasaun reál ne’ebé infrenta atu nune’e ho intendementu ne’ebé di’ak entre jestaun manajemen orgaun komunikasaun sosiál ho profisionál sira atu hetan intendementu ne’ebé di’ak kontinua hotu hotu kompremitidu atu servisu fo nafatin informasaun maske ho ho saláriu ka ho rekompensa ne’ebé mínimu.
Husu mós atu identifika problema no mobilija rekursu atu buka apoiu hosi ultrapasa krize ne’ebé afeta.”