Dili, Conselho de Imprensa de Timor-Leste (CI) no UNDP Timor-Leste organiza avaliasaun loron sorin, hamutuk ho partisipantes Treinamentu Jornalizmu Kompriensivu, iha salaun Konferénsia Maubara Room, Timor Plaza, Dili, hodi halo evaluasaun ba hetan fed back no sujestaun kona-ba lala’ok treinamentu, matéria treinamentu, fasilitadór treinamentu no seluk tan.
Iha retreat loron sorin iha 3/8/2018, Communication Officer UNDP Timor-Leste, Yuichi Ishida, kongratula partisipantes sira tanba konsege remata treinamentu Jornalizmu Kompriensivu ne’e ho di’ak.
Yuichi, rekoñese katak tempu ba aprende matéria sira hanesan Video no Photo Journalism, matéria hanesan data journalism, iha loron ida ka rua nia laran ne’e la sufisiente.
Ikus liu, Communication Officer UNDP Timor-Leste, ne’e mós kongratula dala ida tan partisipantes nain rua hanesan Mateus Barros, Sefe Redasaun Sentru Midia Investigative Onlineno no Santina Lúcia da Costa, estudante Komunikasaun Sosiál, Universidade Oriental Timor Lorosa’e (UNITAL), ne’ebé mak konsidera di’ak no partisipa ho maximu tebes iha treinamentu hodi entrega prémiu simples hanesan kamizola.
Iha fatin hanesan Country Correspondent ba Timor-Leste, Papua New Guinea no Solomon Islands ba Reporters Sans Frontiers (Paris), Bob Howarth, nu’udar mós fasilitadór ba Treinamentu Jornalizmu Kompriensivu kontente ho partisipasaun foin sae sira iha treinamentu ne’e no entrega mós prémiu ba partisipantes nain rua ne’ebé tama kategoria partisipa di’ak no maxima iha treinamentu ho prémiu simples hanesan sapeo.
Iha nia diskursu, Diretora Ezekutiva Conselho de Imprensa de Timor-Leste (CI), Ana Teresa Sequeira, kongratula partisipantes hotu ne’ebé partisipa iha treinamentu, Diretora Ezekutiva ne’e hateten katak, “imi luta to’o liña ikus, parabéns ba imi hotu, atu dehan de’it oportunidade hanesan ne’e la barak atu hetan.”
“Ida ne’e di’ak ba futuru nasaun ninian, liuliu iha área jornalizmu tanba ita iha jornalista kualidade ne’ebé nia númeru aumenta tan, fó parabéns mós ba estudante sira tanba foin hahú maibé hahú ho buat ne’ebé mak boot,” dehan Diretora Ezekutiva CI ne’e.
Partisipantes sira kestiona kona-ba oráriu no oras treinamentu ne’ebé dala balun halai sees hosi oráriu ne’ebé iha ka iha mudansa derepente ba oráriu, hodi afeta ba sira ninia serbisu no presensa iha fatin treinamentu.
Hatán ba ne’e, UNDP no CI esforsu atu prepara di’ak liután planu treinamentu ba etapa tuir ho di’ak liután.