Atividade

Data Jornalizmu Importante Tebes ba Jornalista sira

Data Jornalizmu Importante Tebes ba Jornalista sira

Díli – Conselho de Imprensa de Timor-Leste (CI), serbisu hamutuk ho Ajensia Nasoens Unidas ba Programa Dezenvolvimentu (UNDP), iha ne’ebé hetan apoiu finanseiru hosi povu Japaun, fasilita treinamentu jornalizmu komprensivu ba jornalista, estudante komunikasaun sosial UNTL no UNITAL, Radiu Komunidade inklui Media officer sira instituisaun estadu nian.

Iha formasaun ne’e, CI no UNDP serbisu hamutuk ho Southeast Asian Press Alliance (SEAPA) fasilita mós sesaun “Data Journalism” durante loron rua (14-15/07), hosi Alerts Officer SEAPA, Kathryn Roja G. Raymundo.

Iha sesaun abertura formasaun data journalism, Diretora Ezekutiva CI, Ana Teresa Sequeira hatete data journalism importante tebes ba jornalista sira hodi hala’o knar hanesan jornalista ida.

“Ita boot sira bele akompaña treinamentu ne’e atu bele aproveita matenek sira ne’ebé iha. Treinamentu ne’e nia folin karun tebtebes iha liur, agora fó ita boot sira ho gratuita, favor ida akompaña ho didi’ak”, dehan diretora ezekutva.

Iha sesaun aprezentasaun, formadora Kathryn Roja hatete data journalism importante tanba data journalism bele ajuda ita fahe informasaun ne’ebé komplikadu uituan ho maneira ne’ebé simples.

Nia hatutan serbisu iha era dijitál iha mundu ohin loron maka jornalista sira presiza buka hatene (peskiza), halibur hamutuk no vijualizadu dadus sira ne’e hodi ajuda publiku atu asesu liuhosi dalan ne’ebé simples liu.

Entretantu partisipantes ba treinamentu data journalism hatete sira kontente tanba bele apriende buat foun ida ne’ebé bele ajuda tebes sira nia serbisu loron-loron hanesan ema jornalista ida no estudante iha universidade.

“Importante tebes ba ita nia serbisu jornalsmu ne’e, tanba se ita la aprende data journalism entaun ita lahatene oinsa hetan dadus ne’ebé akuradu”, dehan Mario de Oliveira Pires, jornlista Rádiu Timor Kmanek (RTK). 

Nia kompromete atu aplika koñesimentu hirak ne’ebé nia hetan durante treinamentu data journalism, iha nia kna’ar fatin tanba data journalism importante tebes iha mundu jornalismu nian.

Iha fatin hanesan, estudante Komunikasaun Sosiál, Universidade Oriental Timor Lorosa’e (UNITAL), Santina Lúcia da Costa hatete nia apriende buat foun ida iha mundu jornalizmu kona-ba oinsa maka halibur no produs dadus sira ho gráfika de’it.

“Ha’u sente kontente tebes tanba materia ne’e foun ba ami nu’udar estudante komunikasaun sosial. Data jornalizmu ne’e ema barak maka lahatene liu-liu ba jornalista sira sa tan ami estudante”, akresenta Santina.

Nia dehan treinamentu data journalism fó vantajen boot ba sira hanesan estudante tanba ne’e nia hato’o agradese wa’in ba CI no UNDP tanba bele fasilita ona treinamentu ne’e ba sira.