Dili, apresiasaun ne’e hato’o husi Prezidente CNE, Alcino Baris, Xefe Departamentu Edukasaun Eleitorál STAE, Carceres Ximenes, no Asesór Juridiku Komandante Jerál PNTL, Virgílio Domingos Correia, iha seisaun apresentasaun ba datolu, konferénsia internasionál Dili Diálogu Forum, iha salaun konferénsia Ministériu Finansas, Aitarak-Laran, Dili, quinta-feira (19/07/18).
Prezidente Komisaun Nasionál Eleisaun CNE, foka nia aprezentasaun ba progresu no susesu ne’ebé mídia halo iha períodu eleisaun Parlamentar Antesipada, “ami tenki agradese ba mídia sira ne’ebé serbisu hamutuk ho CNE hodi fahe informasaun kona-ba kampañia no eleisaun sira tomak, halo kontajen, apuramentu distritál no nasionál,” esplika Alcino Baris.
Baris husu Conselho de Imprensa tau matan ba informasaun falsu no la iha balansu iha mídia profisionál balun no mídia sosiál, “buat ida ne’ebé ’e ami la konsegue kontrola ida mak facebook, tamba halo informasaun balun mak provokativu tebes no defama ema i tau ami nu’udar gestor eleisaun iha perigu, balun sem konfirmasaun.” Esplika Prezidente CNE.
Iha fatin hanesan, Carceres Ximenes, Xefe Departamentu Edukasaun Eleitorál no Formasaun STAE Nasionál, esplika servisu STAE no agradese mídia nia kontribuisaun durante kampañia no eleisaun, “ami agradese tabes tamba mídia sira bele sai nu’udar fontes hosi partidu sira hodi transfere informasaun ba eleitores sira hodi hatene kona-ba programa no prioridades hosi Partidu Polítiku sira.” Haktuir Carceres Ximenes.
Nune’e mos, Virgílio Domingos Correia, Asesór Juridiku Komandante Jerál PNTL, liga nia aprezentasaun ba mídia nu’udar parseiru ne’ebé importante ba PNTL durante kampañia no Eleisaun Antesipada, “ita hatene katak iha timor laran tomak iha centru votasaun no iha estrageirus, Jornalista no PNTL halo atividades iha Timor-Leste laran tomak ne’e laos serbisu fasíl.”
Nia rekomenda persiza iha regulamentu hodi penaliza autor ne’ebé insulta ema iha facebook. “Ha’u hatene mídia Sosiál ne’ebé defama ita persiza regulamentu ida iha futuru atu ita penaliza ema ne’ebé insulta,”deklara Asesór Juridiku Komandante Jerál PNTL.
Iha sesaun ne’e, partisipantes sira kestiona kona-ba servisu órgaun eleitorál sira hanesan CNE no STAE tamba tinta ne’ebé uza iha eleisaun la iha kualidade, mudansa lei eleisaun tamba la autoriza jornalista vota mobél, exigy PNTL liu husi Servisu Investigasaun Kriminál (SIK) hodi buka tuir autor ne’ebé defama lider nasionál sira iha mídia sosiál, independensia Prezidente CNE no seluk tan.
Hatán ba kestaun ne’e, Prezidente CNE esplika katak tenta ne’ebé UNDP sosa ba eleisaun laos la iha kualidade maibe tekniku eleitorál sira la doko tinta hirak ne’e molok sira uza. Enquantu kritika kona-ba nia independensia, Alcino Baris, hatete ne’e normál maibé kaulker disizaun iha CNE desidi iha plenaria.
Asesór Juridiku Komandante Jerál PNTL, esplika katak, , kualkér asaun membru PNTL iha terenu la la’o tuir orden bele hato’o keixa ba PNTL hodi kontinua prosesa ba Ministeriu Publiku.
Xefe Departamentu Edukasaun Eleitorál no Formasaun STAE Nasionál, Carceres Ximenes, esplika katak Lei Eleisaun dehan tenke iha kredensial atu asesu ba fatin sira iha sentru votasaun sira, se funsionáriu STAE Rasik la kumpre ida ne’e sei iha pena.
Parseiru importante sira ne’ebé fó apoiu ba realizasaun Dili Diálogu Forum hanesan, Ministériu Negósiu Estranjeiru no Kooperasaun - MNEC, Ministériu Finansas, UNESCO, UNDP, Embaixada Nova Zelandia, Timor-Telecom, Aero Dili, Timor Holding, AGEH no seluk tan.