Díli – Conselho de Imprensa de Timor-Leste (CI), husu ba Parlamentu Nasionál (PN) no VIII Konstitusionál atu kria lei ba rádiu no televizaun (undang-undang penyiarang) hodi regulariza meiu komunikasaun sosiál hanesan rádiu no televizaun nian iha Timor-Leste.
Kestaun ne’e hato’o hosi Prezidente CI, Virgílio da Silva Guterres, bainhira hala’o enkontru ho Prezidente Parlamentu Nasionál (PPN), Arão Noé de Jesus, nomós Ministru dos Negósius Estranjeiru no Kooperasaun (MNEK), Deonísio Babo Soares.
Enkontru CI ho PPN no MNEK hala’o iha loron Kuarta-Feira (11/07), iha fatin ne’ebé la hanesan. Conselho de Imprensa hala’o sorumutu ho PPN iha nia gabinete prezidente parlamentu entretantu enkontru ho MNEK realiza iha Gabinete MNEK, Pantai Kelapa, Díli.
Bainhira remata enkontru ho PPN, Prezidente CI, Virgílio Guterres ba Jornalista Rádiu Parlamentu Nasionál hatete lei rádiu no televizaun nian importante tebes ba CI hodi halo kontrolu.
“Aujénsia kuadru legál kona-ba rádiu televizaun ninian, ida ne’e maka ami hato’o atu parlamentu bele mós propoin ka halo komunikasaun ho Governu atu bele hahú elabora lei ne’e,” Prezidente dehan.
Iha enkontru ne’e mós figura númeru primeiru iha CI ne’e husu ba PN atu tau atensaun mós ba serbisu públiku no mós edifísiu Rádiu Televizaun Timor-Leste, Empreza Públika (RTTL,EP) ne’ebé nia kondisaun komesa at ba bebeik.
Asuntu seluk ne’ebé koalia mós iha enkontru ne’e mak hanesan progresu serbisu iha Conselho de Imprensa, preparasaun konferénsia internasionál “Dili Dialogu Forum”, inklui monitorizasaun Conselho de Imprensa ba públikasaun notisia iha mídia nasionál sira.
Kestaun hanesan, levanta mós hosi Prezidente CI, bainhira hala’o enkontru ho MNEK, Deonísio Babo Soares, iha Edifísiu MNEK, Prai dos Coqueiros, Díli.
Hatan ba kestaun sira ne’e, Prezidente Parlamentu Nasionál hatete parlamentu sempre fó apoiu ba polítika hotu Konsellu de Imprensa nian inklui kriasaun lei ba rádiu no televizaun ninian.
Iha parte seluk, PPN sujere ba CI atu hahú inisiativa kria lei rádiu no televizaun ne’e hosi Governu nune’e bele hetan aprovasaun iha Konsellu Ministru hafoin haruka ba parlamentu hodi halo diskusaun.
Kona-ba RTTL,EP, PPN hatete tuir loloos instituisaun estadu hanesan RTTL,EP labele politija nune’e bele fó impaktu ba nia dezenvolvimentu rasik tanba kada polítika ida kaer ukun sempre troka hela de’it lideransa sira iha RTTL,EP.