Prezidente CI: EUA Sei Apoiu Dezenvolvimentu Mídia iha Timor-Leste

Prezidente CI: EUA Sei Apoiu Dezenvolvimentu Mídia iha Timor-Leste

Atividade Hare nain: 1868

Dili -  Embaixada Estadu Unidos da America (EUA) promote sei apoiu dezenvolvimentu mídia iha Timor -Leste, liu-liu kapasitasaun lingua ingles ba jornalista sira.

Hanoin hirak ne’e hato’o husi Deputy Assistant Secretary, Bureau of east Asian and Pacific Affairs, Walter Douglas, liu husi sorumutu ho reprezentante mídia na’in sira, xefe editór, inklui diretór informasaun sira, iha salaun plenaria Conselho de Imprensa, foin lailais ne’e. 

Prezidente Conselho de Imprensa, Virgílio da Silva Guterres esplika, enkontru ne’e atu rona organizasaun Mídia sira, jornalista senior sira, diretór informasaun sira kona-ba dezafiu no problema saida de’it mak sira hasoru.

Tanba ne’e Virgílio da Silva Guterres, esplika liu husi sorumutu referee iha preokupasaun balun ne’ebé hato’o husi organizasaun mídia no jornalista sira kona-ba difikuldade ne’ebé sira hasoru.

Nia dehan, Apoiu Estadus Unidus America nian ba Dezenvolvimentu Mídia iha Timor-Leste ne’e nia gráfiku tun tebes hafoin fó atensaun hahú husi tinan 999 to’o mai iha 2011.

“Tanba ne’e kolega sira nia rekomendasaun ba EUA atu konsidera hahú fila-fali nia programa ba mídia sira, liu-liu iha programa prátika sira hanesan on job training ka estudu komparativu sira ne’ebé envolve jornalista sira”, nia esplika.

Liu husi sorumutu ne’e mós EUA hato’o sira nia hanoin iha enkontru ne’e atu konsidera preokupasaun sira ne’e hotu.

“Maibé Estadus Unidus sira hatete depende ba jornalista sira nian apoiu tanba dala ruma EUA loke sira nia programa maibé ema la apoiu no la ba mós hanesan de’it”, prezidente aumenta.

EUA sira mós fó nia ezemplu ida mak husi parte Estadu Unidus Amérika sira fó apoiu ba jornalista sira atu ba tuir kursu iha ONG Internasionál LELI maibé Jornalista sira ba rejistu de’it no ikus mai la ba tuir kursu ne’e.

Virgílio haktuir, EUA aproveita oportunidade ida ne’e hato’o nia apresiasaun ba implementasaun demokrasia iha Timor Leste.

“Embaixadór dehan nia hare Timor hanesan nasaun ida ne’ebé foin mosu maski prosesu governasaun ne’ebé troka ba mai, maibé nia garantia ba liberdade imprensa ne’e maka’as nafatin,” Prezidente haktuir.

Hafoin halo sorumutu ho EUA, Diretora Timor Post, Santina de Araujo, agradese tanba EUA rasik bele rona mídia iha Timor-Leste, no bele apar ho situasaun dezenvolvimentu mídia nia iha nasaun ne’e. “Husi parte Timor Post, hakarak rekomenda ba sira mak kapasitasaun ba jornalista sira, liu-liu ba lingua ingles,” Diretora nia rekomendasaun.

Tanba tuir Diretora, dala barak atividade iha Embaixada sira ne’e dala ruma Jornalista labele halo kobertura iha fatin referee tanba falta koñesimentu ba lingua ingles.

Santina de Araujo, subliña, se kuandu husi enkontru ida ne’e, ne’ebé hetan rekomendasaun barak mak ikus mai rekomendasaun ne’e bele implementa maka nia parte sente ba futuru jornalista barak sei komprende no bele hakerek di’ak liu lingua ingles. (Prizaldo)