CI Fasilita DJ-Ambiente Halo Aprezentasaun ba Partisipantes Treinamentu Jornalizmu Komprensivu

CI Fasilita DJ-Ambiente Halo Aprezentasaun ba Partisipantes Treinamentu Jornalizmu Komprensivu

Atividade Hare nain: 3353

Díli – Conselho de Imprensa de Timor-Leste (CI), fasilita Diretór Jerál (DJ) Ambiente hodi halo aprezentasaun kona-ba serbisu diresaun ambiente nian ba partisipantes treinamentu jornalizmu komprensivu.

Iha aprezentasaun ne’ebé hala’o iha Ótel Ramelau, Aimutin, Díli. iha Kinta-Feira (28/06), Diretór Jerál Ambiente hosi Sekretariu Estadu Ambiente, João Carlos Soares, ko’alia barak liu kona-ba problema bee moos, reflorestasaun no lixu ne’ebé fó impaktu ba meiu ambiente iha Timor-Leste.

Kona-ba problema lixu, DJ ne’e dehan komunidade sira seidauk iha konxiénsia hodi halo reparasaun ba lixu, inklui sunu lixu arbiru.

“Tuir loloos, modo kain no tahan sira ne’e ita la presiza soe, ba hotu tempat sampah entaun volume sampah ne’e tanba ai-tahan ne’e ita ba soe hotu. Tuir loloos ne’e uma lidun sira ne’e ita bele kuda netik buat ruma, ai-tahan sira ne’e bele sai adobo. Barak liu iha ita nia komunidade ne’e maka sunu arbiru de’it,” hatete DJ João.

Entretantu kona-ba kasa animal fuik, Diretór Jerál kondena makaas katak aktus sira hanesan ne’e krime kontra biodiversidade ninian.

Iha parte seluk responsavel ne’e moos ko’alia kona-ba komunidade sira ke’e bee posu arbiru ne’ebé fó impaktu mós ambiente.

“Rejime aqua no saneamentu ninian, ita hatene katak perfurasaun bee ne’e perigu sé ke’e ona iha fatin ida tenke ke’e fali iha fatin seluk, labele besik malu. Iha sidade Díli laran iha ona regra ida katak labele ke’e bee, sidade dili ne’e sei simu fornesimentu bee hosi pam,” DJ esplika.

Iha sesaun diskusaun, jornalista sira hamutuk rua nulu resin ne’e, kestiona kona-ba komunidade sira ne’ebé seidauk informadu nune’e sira sei nafatin estraga animal fuik sira, tesi ai arbiru no soe fo’er laiha fatin.

Jornalista sira mós levanta problema sira hanesan komunidade sira sunu rai arbiru tanba Guarda Florestá sira la halo knar iha postu permanente sira ne’ebé estabelese ona.

Hatán kona-ba problema sira ne’e, DJ dehan oras ne’e daudaun nia diresaun halo hela serbisu maka’as kona-ba Sosializasaun ba komunidade sira nune’e bele prevene aktus sira ne’ebé bele fó risku ka ameasa ba ita nia ambiente iha Timor-Leste.

“Ami taka sticker ba karreta sira públiku ne’e para labele soe lixu, maibé na realidade ita mak ko’alia hela ba maibé soe nafatin de’it, ita tenke uza lei duni.”  

“Ami iha mekanizmu sira, ida mak sensibilizasaun rasik iha aula no sensibilizasaun jerál, desiminasaun kona-ba lei ne’ebé maka vigora iha Timor-Leste,” Dehan DJ ambiente. (CI)