Dili, Diretór Diresaun Dezenvolvimentu no Analiza Mídia (DDAM-CI), Alberico da Costa Junior, nu’udar oradór iha treinamentu ne’e esplika kona-ba saida mak étika liga ho matenek nain balun nia koñesimentu kona-ba kóde étika.
“Kóde étika nu’udar estudu ida kona-ba formasaun valor sira morál nian no prinsipiu sira kona-ba buat loos no sala (altsschull, 1990),” esplika Alberico da Costa Junior, iha treinamentu jornalizmu kompriensivu ba dala 14 kona-ba Etika Jornalizmu.
Programa ne’e organiza hosi Conselho de Imprensa de Timor-Leste (CI) no UNDP Timor-Leste, iha salaun Ótel Ramelau, Aimutin, Dili, Kinta, 21/6/2018.
Diretór ne’e hatete relasiona ho jornalizmu, étika nu’udar prespetiva moral ne’ebé refere ba foti desizaun kona-ba kobertura no halibur faktu sai notisia.
Treinador ne’e afirma mos katak kodigu etika nu’udar regra morál, ka matadalan hahalok nian ne’ebé ajuda asaun pesoál iha situasaun espesiál.
Hatán ba perguntas partisipantes sira relasiona ho oinsá hakerek naran hosi autór ka vítima kazu ruma liga ona ho étika jornalizmu, Alberico da Costa Junior, esplika katak kóde étika iha papél importante iha área journalizmu.
“Iha kontestu jornalístika, kódigu étika hola papél importante tebes iha mundu jornalizmu. nu’udar matadalan ba valor sira profisaun jornalista nian, jornalista sira iha obrigasaun tenke kompriende no tenke kumpri,” dehan Diretor Diresaun Dezenvolvimentu no Analiza Mídia.