Polísia Tránzitu husu Jornalista Uniforma ba Kobertura iha Terenu

Polísia Tránzitu husu Jornalista Uniforma ba Kobertura iha Terenu

Atividade Hare nain: 1815

Díli – Polísia Tránzitu husu ba jornalista sira bainhira ba halo kobertura iha terenu tenke uniforma hanesan hatais farda no tara kartaun mídia nian nune’e labele hamosu dezentendimentu entre parte seguransa no jornalista sira rasik.

Reprezentante Polísia Tránzitu, José António, iha sosializasaun lei Komunikasaun Sosiál no regulamentu sira Conselho de Imprensa de Timor-Leste (CI), husu atu jornalista lista sira uniforma bainhira halo kobertura iha terenu.

“Jornalista sira hotu tenke uza uniforma para ami bele koñese jornalista ida ne’e hosi mídia ida ne’ebá, la’ós jornalista mai ho kartaun de’it tanba kartaun ne’e ema bele halo. Ida ne’ maka kria konfuzaun entre jornalista ho polísia ka siguransa,” dehan Jose Antonio.

Iha fatin hanesan, Komandante PNTL Munisípiu Díli, Superintendente Xefe, Pedro Belo mós hato’o ba CI katak jornalista sira tenke tara kartaun bainhira ba halo kobertura tanba dala barak jornalista sira nunka tara kartaun bainhira halo entrevista.

“Ami mós husu liuhosi Conselho de Imprensa, jornalista sira ne’ebé atu ba hasai filmajen tau nia kartaun ho naran. Agora jornalista balun ba subar fali hosi kotuk-kotuk maka hasai foto hosi kotuk, dala ruma polísia mós deskonfia fali keta ema ne’e inimigu ruma karik.”

“kartaun laiha, foka fali hosi kotuk ne’e. nusa la hatudu an dehan ha’u hosi ajénsia ida ne’e, ha’u presiza para hetan informasaun,” dehan Pedro Belo.

Iha biban ne’e, Diretora Ezekutiva CI, Ana Teresa Sequeira konkorda ho asuntu ne’ebé PNTL levanta tanba kartaun ema bele manipula tanba iha mundu jornalizmu ohin loron mosu estilu ida dehan “Wartawan Abal Abal” katak ema ida bele iha kartaun hosi mídia barbarak.

“Sujestaun kona-ba uja uniforma, ha’u konkorda. Kartaun ne’e loos duni ema bele manipula, iha istilah foun ida ami bolu dehan wartawan abal abal ne’e dehan katak ema ida de’it iha kartaun hosi mídia barabarak,” dehan Diretora Ana Teresa Sequeira.

DE dehan uniforma sai hanesan evidensia ne’ebé mak di’ak para bele justifika hodi apoiu serbisu polísia nian iha terenu.

Diretora mós rekoñese katak mídia barak maka iha ona uniforma maibé balun seidauk. DE espera katak iha futuru tuir mai mídia sira iha kapasidade finanseira rasik hodi bele produz sira nia farda instituisaun rasik.

CI mós iha ona hanoin atu oinsá bele produs kazaku jornalista nian ne’ebé bele hatudu identidade jornalista sira, maski nune’e CI sei hein hela orsamentu iha Governasaun ida tuir mai ne’e hodi bele tau konsiderasaun ba kestaun referee. (CI)