CI Sosializa Lei KomSos no Regulamentu sira ba PNTL Munisípiu Díli

CI Sosializa Lei KomSos no Regulamentu sira ba PNTL Munisípiu Díli

Atividade Hare nain: 2027

Díli – Conselho de Imprensa de Timor-Leste (CI), kinta-feira (20/06), iha salaun Ótel Garden Beach, Praia dos Coqueiros, hala’o Sosializasaun Lei Komunikasaun Sosiál (KomSos) no regulamentu sira CI nia ba komandu Polísia Nasionál Timor-Leste (PNTL), Munisípiu Díli.

Iha abertura, Konselleiru Conselho de Imprensa, Paulo Adriano da Cruz Araujo hatete PNTL nia papél maka oinsa atu halo harmonizasaun iha ita nia sosiedade

“PNTL distritu Díli ne’e ha’u hare katak nia papél ne’e importante tebtebes tanba nia hare ba ita nia seguransa iha capital Díli nian iha ne’ebé nia komplesidade kazus nian, ita hare ba seguransa la’ós munisípiu Dili de’it maibé bele afeta ba nasaun tomak,” dehan Konselleiru Paulo.

Hare ba serbisu PNTL no Mídia sira nia maka ita hasoru hela dezafiu boot tanba PNTL mós iha nia regras rasik katak ema hotu tenke kumpre leis ne’ebé iha ona.

Konselleiru Paulo dehan, dala ruma akontese dezentendimentu iha parte sira hanesan polísia taka dalan maibé jornalista sira hakarak tama de’it hosi buka informasaun.

Parte seluk tuir konselleiru Paulo dala ruma polísia halo hela investigasaun ba kazu ruma maibé jornalista sira hakarak buka kedas informasaun, ne’e la tuir regras ne’ebé eziste. “Entaun komunikasaun ne’e importante entre polísia ho jornalista sira,” dehan Konselleiru Paulo.

Konselleiru Paulo mós hato’o agradese wa’in ba PNTL munisípiu Dili ne’ebé iha ona interese bele mai partilla hamutuk informasaun ho CI hodi halo harmonizasaun entre PNTL ho mídia sira.

Entretantu iha abertura, Komandante PNTL Munisípiu Díli, Superintendente Xefe, Pedro Belo, hatete loron ida ne’e importante tebes ba parte seguransa nian tanba tinan barak serbisu hamutuk ho mídia maibé seidauk hatene lala’ok lei komunikasaun sosiál.

“Loron ida ne’e di’ak tebetebes ba ita seguransa ninian, tanba tinan barak ita serbisu hamutuk ho kolega sira mídia, ita nunka hatene sira nia lei ne’e oinsá, entaun dala barak ita iha problema uitoan iha terenu,” hatete Pedro Belo.

Nia dehan PNTL implementa sira nia dever nu’udar siguransa dalaruma bandu jornalista sira atu labele tama maibé jornalista sira obriga atu tama nune’e hamosu dezentendimentu entre jornalista ho PNTL iha terenu.

“Tuir loloos ne’e ita sira ne’e maka asegura malu, para ita nia maluk sira hosi mídia nian fó informasaun ba iha ita nia komunidade,” esplika Komandante PNTL Munisípiu Díli, Superintendente Xefe, Pedro Belo.

Pedro Belo rekoñese katak bainhira PNTL halo buat barak maibé mídia laiha no la fó sai saída maka PNTL halo maka komunidade nunka hatene atividade sira PNTL nian. “Kuandu ita serbisu hamutuk ho Mídia ho di’ak, ita serbisu minute ida de’it mós ema fó sai katak polísia sira halo duni serbisu,” Pedro Belo akresenta.

Partisipa mós iha sosializasaun Lei Komunikasaun Sosiál no regulamentu sira CI nian maka, Komandu PNTL munisípiu Dili hosi seksaun Tránzitu, Seksaun Polisia komunitáriu, Seksaun Polísia investigasaun, Seksaun Polisia Task Force no Seksaun Polísia eskuadra. (CI)