Dili, Prezidente Conselho de Imprensa de Timor-Leste (CI), Virgílio da Silva Guterres, hatete kódigu étika etika sai nu’udar parámetru ba CI hodi monitoriza ba produtu jornalístika.
“Iha balun ne’ebé ita bele dehan parámetru ne’ebé Conselho Imprensa uza kontinua hanesan uluk, monitorizasaun regular sira ne’ebé halo barak liu uza kódigu étika jornalistik ne’ebé ita hotu kaer, hanesan sasukat atu sukat notísia ne’ebé tun,” hatete Prezidente CI, iha sesaun abertura publika rezultadu monitorizasaun ba obra jornalístika iha períodu eleisaun antesipada parlamentar 2018, iha salaun konferénsia Beach Garden Hotel, Dili, tersa-feira, 19/6/2018.
“Iha buat balun ita uza prinsípiu báziku demokrasia ninian, ne’ebe regula diretu públiku ninian atu hetan informasaun mós devér órgaun meius komunikasaun sosiál sira atu fahe informasaun ne’ebé kualidade ba públiku,” dehan Prezidenti CI.
Conselho Imprensa mos seidauk bele halo analiza kle’an atu fó paraser ida ne’ebé mós kle’an tanba realidade katak seidauk iha kuadru legal ruma ne’ebé fó dalan atu Conselho de Imprensa halo ida ne’e.
Iha sesaun aprezentasaun hosi Diretór Diresaun Analiza Mídia (DDAM), Alberico da Costa Junior, esplika katak infrasaun barak mak jornalistika ka mídia sira komete mak la halo konfirmasaun ho fontes seluk.
Tuir rezultadu monitorizasaun no análize Conselho de Imprensa nian, infrasaun barak-liu ne’ebé meus komunikasaun sosiál ka jornalista sira komete mak infrasaun hasoru Kódigu Étika Pontu 6 no prinsipiu universál jornalístika cover both sides tamba sira laiha konfirmasaun ho parte seluk kona-ba notisia ne’ebé sira públika. Produtu jornalístika mak la foka ba “angle” ne’ebé ninia impaktu ba povu nia moris di’ak, maibé foka-liu ba komentáriu polítiku sira nian ne’ebé insulta malu ho liafuan sira provokativu (kontein ho hate speech).
Iha serimómia ne’e partisipantes sira husu kona –ba planu asaun CI nian no oinsa bele implementa lei komunikasaun sosiál di’ak no lolos. Partisipantes balun mos kestiona tanba CI halo de’it monitorizasaun ba midia nasionál maibé midia lokál balun lae.
Hatan ba ne’e, Konselleiru CI, Paulo Araujo no Diretora Ezekutiva CI, Ana Teresa Sequeira, esplika katak, CI sei kontinua monitoriza no aprosima ho mídia sira, hodi hasa’e kualidade obra jornalítika. Partisipa iha eventu ne’e mak mídia nain, diretór mídia, xefe redasaun no jornalista sira.