Atividade

Prezidente CI Husu eis Jornalista, Atuál Xefe Suku Lahane Orientál atu Rejistu ba Hetan Kartaun Akreditasaun

Prezidente CI Husu eis Jornalista, Atuál Xefe Suku Lahane Orientál atu Rejistu ba Hetan Kartaun Akreditasaun

Prezidente Conselho de Imprensa de Timor-Leste (CI), Virgílio da Silva Guterres, husu ba eis jornalista, Atuál Xefe Suku Lahane Osidentál,Dili, Trindade do Amaral Pinto Baptista, hodi rejistu ba hetan kartaun karteira profisionál ne’ebé atribui hosi CI.

“Maun Baptista karik iha tempu bele prienxe formuláriu atu hetan kartaun akreditasaun hanesan jornalista tanba ita boot iha direitu,” hatete prezidente CI, Virgílio da silva Guterres, iha Sosializasaun Lei Komunikasaun Sosiál no regulamentu sira CI nian, ba autoridade Munisípiu Dili, Segunda (18/06), iha Ótel Beach Garden, Pantai Kelapa, Dili.

Prezidente rekoñese eis jornalista no atuál xefe suku lahane osidental ne’e prienxe ona kritériu tuir lei Komunikasaun sosiál katak serbisu iha mundu jornalizmu liu tinan lima (5) ba leten, merese atu hetan karteira profisionál.

Prezidente fo hanoin katak eis jornalista ne’e simu tiha kartaun karteira profisionál maibé bele tau du’ak de’it, nune’e bainhira mandatu ramata hanesan xefe suku, bele kontinua hikas profisaun hanesan jornalista.

Hatán ba ne’e, Eis Jornalista, Trindade do Amaral Pinto Baptista, hato’o agradese wa’in ba prezidente CI ne’ebé bele rekoñese nia kontribuisaun durante serbisu iha mídia.

Nia dehan konvite prezidente CI nian ne’e hanesan onra boot ida ba jornalista sira hotu ne’ebé kontribui ona iha mundu jornalizmu. “Ba ha’u obrigadu tebtebes tanba bele fó fila fali konsiderasaun ba eis jornalista sira,” dehan eis jornalista Trindade.

Nia parte sei ba rejistu duni iha CI hodi hetan kartaun kerteira profisionál tuir lei komunikasaun sosiál haruka, nune’e bainhira nia mandatu nu’udar autoridade lokál ramata, bele fila ba serbisu nu’udar jornalista. (CI)