Conselho de Imprensa Mosu Atu hatutan Mandatu Liberdade Imprensa no Liberdade Espresaun iha TL

Conselho de Imprensa Mosu Atu hatutan Mandatu Liberdade Imprensa no Liberdade Espresaun iha TL

Atividade Hare nain: 6135

Díli – Ejistensia Conselho de Imprensa de Timor-Leste (CI), atu hatutan mandatu liberdade Imprensa no liberdade espresaun iha Timor-Leste (TL), ne’ebé konsagra ona iha konstituisaun RDTL artigu 40 no 41.

“Conselho de Imprensa mosu atu hatutan mandatu ida ne’e, tanba liberdade ne’e garante ona iha konstituisaun artigu 40 no 41, entaun mandatu atu hatutan ne’e mak Conselho de Imprensa,” Prezidente CI, Virgílio da Silva Guterres hato’o kestaun ne’e bainhira sai nu’udar oradór iha semináriu nasionál ho tema “Valoriza no Habelar Espíritu 20 de Maiu de 2002”, ne’ebé organiza hosi organizasaun Kadalak Timor-Leste, iha salaun Canossa Becora Díli, iha loron 17/05.

Alien de promove liberdade imprensa no liberdade espresaun, mandatu seluk CI nian maka oinsá bele garante no defende independénsia editorial mídia, independénsia jornalistika no mós oinsá atu fó kapasitasaun ba profisionais komunikasaun sosiál sira.
Prezidente CI hatutan, CI mós atu garante ba direitu públiku nian ba asesu informasaun ho loos no moos. Tanba ne’e, iha lei komunikasaun sosiál fó liberdade total ba jornalista sira atu hakerek informasaun bazeia ba faktu nune’e bele transmite ba públiku.

Nia dehan polítika iha nasaun demokrasia, iha diferensa ideia ne’e nesesidade importante tanba sé laiha diferensa maka nasaun sei la la’o ba oin.

“O nia ideia ne’e ema atu fiar ka adopta, pelumenus tenke uza buat tolu ne’ebé bele enkoraja ema, primeiru, Logos/lójika, segundu, Pathos/emosaun no terseiru, Ethos/karate. Pelumenus buat tolu ne’e ita hahú halo hodi forma opiniaun públika,” esplika Prezidente CI.

Ativista ne’e esplika iha era ukun-an, ita presiza hamosu kanais sira hanesan órgaun no meius komunikasaun sosiál hodi bele hato’o opiniaun pesoál ema ida-idak nian
“Ita iha rádiu, ita iha televizaun ho mós jornais sira. Problema jornais no rádiu sira ne’e loro-loron fó informasaun ne’ebé mai hosi ita nia boot sira ka mai hosi fatin seluk, dala barak liu pájina primeiru maka ko’alia kona-ba informasaun rai laran,” nia esplika.

Partisipa iha Semináriu ne’e maka, Sekretáriu Estadu Juventude no Traballu, Nívio Magalhães, Emprezáriu Timoroan, Rui castro, Padre Ángelo Salsinha no Padre Martinho Gusmão, no estrutura organizasaun Kadalak Timor-Leste. (CI)