Atividade

SEJT Identifika Joven Barak La Iha Serbisu

SEJT Identifika Joven Barak La Iha Serbisu

Dili, Diretór Jerál Sekretáriu Estadu Juventude Trabalho-SEJT, Paulo Alves, hatete SEJT identifika númeru desempregu iha Timor-Leste as ne’ebé maioria joven tinan 17 ba leten.
 
Iha treinamentu ne’ebé realiza iha salaun Hotel Ramelau, kuarta-feira, 20/05/2018, Diretór Jerál ne’e hahú nia aprezentasaun ho istória badak kona-ba SEJT eziste no ko’alia mós kona-ba papél SEJT nian iha apoiu foin-sae sira iha Timor-Leste oinsá kompete iha kampu trabalho.
 
Diretór Jerál ne’e fahe mos informasaun sira iha sektór privadu, área formasaun profisionál no empregu,“ita liga juventude ba formasaun, ita liga juventude ba empregu, se ita liga ba formasaun sá formasaun mak bele nesesita sira atu bele hetan empregu ho lailais,” dehan DJ SEJT. 
 
Paulo Alves hatutan katak númeru desempregu iha Timor-Leste makas, “hanesan ita boot sira hatene ita nia númeru desempregu iha 11 %, 11% ne’e hosi ne’ebé, iha peskiza ne’ebé ita halo iha 2013,  Timor nasaun ki’ik maibé númeru desempregu boot tebes.”
 
Diretór Jerál ne’e haklean liután katak ema ne’ebé seidauk iha serbisu barak liu mak joven, “ita ko’alia kona-ba desempregu la sees hosi juventude, tanba idade produtiva ne’e hosi idade 17 e iha peskiza ne’e mós ita hare ita nia númeru populasaun barak liu ne’e juventude.”
 
Iha apresentasaun ne’e partisipantes treinamentu hosi Radio Timor Kmanek, Vito Salvador, husu perguntas kona-ba polítika husi SEJT hodi redús desempregu no saláriu mínimu.
 
Nune’e mós ho partisipantes husi Centro Mídia Investigativu, Mateus Barros, husu kona-ba polítika SEJT relasiona ho ensinu sekundariu jerál ne’ebé muda ba ensinu vokasionál.
 
Theotonio Alves Pinto hosi Radio no Televizaun GARDAMOR, husu oinsa SEJT nia atensaun ba joven sira ne’ebé ba serbisu iha Ukránia no Inglaterra ne’ebé trata dokumentu liu hosi embaixada Portugal.
 
DJ SEJT fo resposta ho esplika kona-ba desde SEPFOPE nia tempu, proposta auto-empregu ne’ebé tama kada tinan ho total mil oitusentus ital, orsamentu ne’ebé iha ba de’it 30 proposta.
Paulo Alves esplika mós kona-ba nota entendimentu ba akredita ensinu vokasionál no relasaun bilateral sira ne’ebé Timor-Leste iha.