Díli – Prezidente Conselho de Imprensa de Timor-Leste (CI), Virgílio da Silva Guterres, hatete ba estudante kursu jornalizmu iha NGO nasionál Grace for Development (GFD), katak hakarak sai jornalista tenke lee no hakerek barak.
“Sé imi iha duni Interese atu sai jornalista, hahú agora hakerek no lee barak,” Prezidente CI, Virgílio ba partisipantes iha semináriu ida ne’ebé organiza hosi GFD, Sábadu, 26/05, iha Vila-Verde-Díli.
Prezidente esplika, profisaun jornalizmu hanesan estudu kontinuasaun tanba ne’e sé maka hakarak sai jornalista maka tenke estuda loron kalan, estuda ekonomia, polítika, saúde, tasi, leis, nst.
Nia dehan, iha aspetu tolu importante bainhira hili dalan sai jornalista maka hanesan Ko’alia, hakerek no rona barak.
Virgílio akresenta jornalista la’ós de’it iha kapasidade atu hato’o ka informa de’it maibé ita mós presiza entende kontestu ruma. “Xave sai jornalista di’ak, katak saida maka fó hatene ba ema, pelumenus ita mós komprende,” dehan Prezidente CI.
Virgílio esplika funsaun jornalista maka atu sai hanesan parte entre ema ne’ebé kaer ukun ho povu, jornalista sai hanesan matan, tilun, no lian ba ema sira lian laek.
Ativista ne’e hatete jornalizmu hanesan fatin atu hakerek, atu diskute no buka tau hamutuk ideia ba asuntu ruma ne’ebé iha Interese ba públiku nian. “Imprensa ema konsidera hanesan kintu (5) podér iha nasaun demokrátiku hodi halo kontrolu ba podér sira seluk,” akresente Prezidente CI.
Iha biban ne’e, Diretór NGO nasionál Grace for Development (GFD), Joannes B. da C. Gomes hato’o agradese wa’in ba oradór sira ne’ebé partilla ona informasaun lubuk ba estudante sira iha biban semináriu referee.
“Ha’u nia respeitu ba oradór sira hotu. Ami laiha buat di’ak id aba ita boot sira, maibé hakarak hato’o de’it ho laran luak ami nia agradese wa’in ba ita boot sira nia prezensa iha GFD,” dehan Joannes.
Joannes informa mós ba bainaka sira katak misaun boot GFD nian maka oinsá atu loke oportunidade mós ba joven sira atu tuir formasaun ba jornalista hodi compete mós iha merkadu traballu iha mundu jornalizmu ninian. (CI)