Dili, Diretór Rádiu Liberdade Dili (RLD), Francisco da Silva Gari, hatete tuir lei komunikasaun sosiál Rádiu Komunidade hari’i laos atu buka lukru.
“Iha Lei Komunikasaun Sosiál artigu 23 ko’alia kona-ba ezistensia meius komunikasaun sosiál sein lukrutivu, ne’e signifika meius komunikasaun ne’ebé harii ne’e, la’ós orienta ba buka lukru.” Fransisco da Silva Gari hato’o liafuan ne’e wainhira nia hahú aprezenta nia matéria kona-ba objetivu harií Rádiu Komunidade tuir lei komunikasaun sosiál, iha treinamentu Jornalizmu Kompriensivu ba sesaun sanulu, ne’ebé hala’o iha Hotel Ramelau, iha loron 24/05/2018.
Diretór RLD ne’e hato’o katak, Rádiu komunidade eziste atu fasilita no distribui informasaun ba komunidade sira, “Iha definisaun balu maka ema ko’alia kona-ba Rádiu komunidade katak estasaun Rádiu ne’ebé harii hosi komunidade, ba komunidade, kona-ba komunidade,” dehan Diretór RLD.
Partisipantes sira barak mak hato’o sira nia opiniaun ba importánsia hosi ezistensia Rádiu komunidade no husu perguntas relasiona ho kontribuisaun Rádiu komunidade nian ba dezenvolvimentu.
Nune’e Diretór RLD, hatán ho fahe informasaun sobre oinsá Rádiu komunidade iha Timor-Leste eziste, tanba saida Rádiu komunidade maneja direita hosi komunidade no oinsá nia influensia ba komunidade nia moris no dezenvolvimentu.
“Hafoin ukun an komesa introdús Rádiu komunidade iha ita nia nasaun maibé pensamentu katak ema ne’ebé serbisu ba Rádiu komunidade hetan saláriu, ida ne’e mak ita seidauk konsege muda ita nia komunidade sira hanoin, pensamentu ne’e sei iha sira nia kakutak tanba sira seidauk senti katak Rádiu komunidade ne’e sira nian,” esplika Diretór RLD.