Atividade

CI Valoriza Jornalista Ne’ebé Mate iha TL

CI Valoriza Jornalista Ne’ebé Mate iha TL

Díli – Loron 3 Maiu koñesidu nu’udar loron mundiál ba liberdade Imprensa, tanba ne’e Timor-Leste (TL), liuhosi Conselho de Imprensa de Timor-Leste (CI) hamutuk ho jornalista no asosiasaun mídia sira mós komemora loron refere.

Conselho de Imprensa hamutuk ho órgaun no meius Komunikasaun sosiál sira, komemora ho modelu la’o ain hosi rotunda Francisco Xavier do Amaral, Cai-coli, tuir dalan liberdade Imprensa ba to’o iha rate matebian jornalista Sunder Tunes iha Becora, Díli.

Iha diskursu, Prezidente CI, Virgílio da Silva Guterres hatete, loron 3 fulan Maiu hanesan loron mundial liberdade Imprensa iha ne’ebé Timor-Leste konsidera mós hanesan loron ida ne’ebé hodi fó valorizasaun ba eis jornalista sira ne’ebé mate iha Timor-Leste.

“3 de Maiu, ita komemora atu hanoin fila fali ita nia maluk jornalista sira ne’ebé mate tanba sira nia profisaun tenke mate iha terenu. Ita hanoin hodi valoriza sira nia sakrifísiu liuhosi ita nia serbisu ne’ebé profesionál,” Dehan Prezidente CI, Virgílio Guterres.

Nia akresenta jornalista hotu-hotu kontinua matebian jornalista sira nia misaun hodi fahe ba públiku. Hamrik iha rate Sander Tunes nia oin, Prezidente CI dehan jornalista estranjeiru ne’e mai mate iha Timor tanba nia profisaun hanesan jornalista.

Antes hala’o long March, liuhosi konferensia Imprensa, Prezidente CI deklara loron 3 Maiu mós hanesan tempu ba lia loos no tempu ba liberdade Imprensa iha Timor-Leste. 

Atu komemora loron ne’e, CI mós partilla ba públiku kona-ba dezafius no obstakulu liberdade Imprensa nian iha Timor-Leste durante tinan 2017 to’o 2018.

“Impedimentu no diskriminasaun hasoru jornalista rua ne’ebé CI rejista kazu dudu ses no duni kamera person iha Aeroportu hosi pesoal balun komisaun organizadór ne’ebé simu negosiadór Prinsipál Kay Rala Xanana Gusmão.” 

“Loron 8 Janeiru 2018, Polisia tránzitu balun bandu jornalista GMN-TV hodi halo cek point ne’ebé sira halo,” Prezidente CI dehan iha kazu seluk mós maka seguransa pesoal balun impede etividade jornalista nian hosi TVTL iha Ministériu Finansas, Aitarak Laran.

Prezidente CI mós lamentavel kona-ba kondisaun ba jornalista sira ne’ebé sei mínimu tebes nune’e bele afeta mós ba produtu jornaliístika no independensia jornalista nian iha atividade loron loron nian. 

Iha fatin hanesan, Prezidente Asosiasaun Jornalista Timor-Leste (AJTL), David Hugo hatete iha tinan ida ba kotuk, CI nomós maluk jornalista sira Timor no mundu tomak halo iha indonézia katak kontra diskriminasaun ba jornalista, agresaun fíziku no intervensaun hasoru mídia.