Dili, Treinador ba materia video journalismu hosi Indonesia, Iman Wahyudi hatete, jornalista ou operadór kámara ne’ebé diak tenki hatene no kompriende sa mensagen iha notísia ne’ebé atu hato’o ba públiku liu hosi video jornalizmu. Tamba ne’e jornalista ka operadór kámara tenki garantia kualidade video no audio (lian) hosi notísia ou reportagen ida ne’ebé fo sai ba públiku liu husi kanál televizaun.
“Operadór kámara barak la dun tau entrese ba kualidade audio wainhira hasai filmagen, diak liu iha prinsipiu primeíru mak audio ho video tenki diak. Imagen ne’ebé la iha lian ne’e signifika frakeza ida”, esplika Iman Wahyudi ba partisipantes treinamentu journalismu komprensivu sira, iha salaun Ótel Ramelau, Aimutin, Dili.
Nia reforsa katak, kuandu apriende kona-ba journalizmu audio visuál ne’e signifika jornalista sira halo komunikasaun ba públiku (hare nain sira / telespetadores) liu husi audio visuál. Alem de ne’e iha eventu ruma jornalista ida tenki hala’o kna’ar hanesan jornalista, operadór kámara, hakerek notísia no halo reportagen.
“Uluk wainhira ita boot sira hare jornalista televizaun to’o iha fatin kobertura iha mós operadór kámara maibé agora jornalista ida tenki hatene hala’o serbisu hanesan jornalista, operadór kámara, nu’udar editor no mós hanesan reporter,” esplika Iman Wahyudi.
Iha treinamentu durante loron rua ne’e, treinador hosi Indonesia ne’e apresenta materia kona-ba tekníku hasai filmagen, intervista, hakerek notísia tv nomós oinsa tekniku halo reportagen direta (stand up reporting) hosi fatin kobertura.
Treinamentu journalismu komprensivu ba fase dahitu ne’e hala’o durante loron rua, hahu Quarta– Kinta (18-19/04/2018), iha salaun konferénsia Ótel Ramelau, Aimutin, Dili.
Programa ne’e realiza tamba serbisu hamutuk entre Conselho de Imprensa ho Agensia Nasoes Undias ba Programa Desenvolvimentu – UNDP.(CI)