Dili, Ajénsia Nasoens Unidas ba Programa Dezenvolvimentu (UNDP), entrega ekipamentus Imprimi kartaun nian ba Conselho de Imprensa, hodi bele produs kartaun karteira profisional.
Prezidente Consello de Imprensa, Virgílio da Silva Guterres, agradese ba UNDP liu-liu povu Japaun ne’ebé ho laran luak fó apoiu ona ba CI.
“Ohin Conselho Imprensa mós agradese tebtebes ba UNDP no liuliu ba Governu Japaun tanba fundus ne’e apoiu mai hosi Governu Japaun, tanba ne’e maka Embaixadór Japaun nian mai partisipa hanesan testamuña serimónia ida ohin,” eplika Virgíliu ba jornalista sira hafoin remata serimónia entrega equipamentu impreime kartaun, ne’ebé hala’o iha salaun enkontru UNDP, Caicoli, Dili, tersa-feira, 17/04/2018.
Nia dehan ho tulun ne’ebé UNDP oferese, bele ajuda mós CI hodi hamenus tan instituisaun ne’e nia dependénsia ba parte seluk.
Prezidente CI, dehan mákina imprimi ne’e Conselho de Imprensa sei uja ba imprimi karteira profisionál ba jornalista sira ne’ebé priense ona kritéria atu hetan karteira profisionál.
Kona-ba operasaun mákina Imprimi refere, Prezidente CI esplika, UNDP sei fó asisténsia ba ofisiál Conselho de Imprensa atu hatene uja no halo manutensaun.
UNDP mós garante katak ekipamentus ho tinta sira ne’e bele uja to’o tinan ida nia laran, tanba ne’e iha tinan ida nia laran CI iha ona ema ida espesifíku bele opera rasik kamera ne’e.
Embaixadór Japaun ba Timor-Leste, Hiroshi Minami, hatete nia mai Timor-Leste iha tinan kotuk no buat ne’ebé halo surpreza ba nia maka estabelesementu sistema demokrasia no paz iha sosiedade nia let ne’ebé diak.
“Hau hanoin jornalista sira nia serbisu importante tebes hodi halo kontrola iha sosidade demokratika.
”Nia dehan sira nia prioridade iha Timor-Leste maka kapasita dezenvolvimentu Timor-Leste inklui desenvolvimentu demokrasia liu husi mídia sira nia serbisu.
Entretantu Koordenadór Rezidénsia Nasoens Unidas no UNDP nia Reprezentante iha Timor-Leste, Roy Trivady hatete serbisu hamutuk entre UNDP no CI ne’ebé hetan fundus hosi Governu Japaun ne’e importante tebes.
Nia dehan serimónia entrega entrega mákina imprimi ne’e simples hela maibé hola parte mós iha projetu boot ida ne’ebé ita serbisu hamutuk.
Roy esplika, Mákina imprimi ne’e importante tebes atu fasilita serbisu sira imprimi nian iha Conselho de Imprensa nian.
Entretantu iha parte seluk, Advisór UNDP-Projetu Eleisaun, Andreas Del Castilo hatete UNDP serbisu hamutuk ho Conselho de Imprensa iha aspetu oioin hodi kapasita jornalista sira nia profesionalizmu.
Nia dehan atividade sira ne’ebé UNDP ho CI serbisu hamutuk hetan susesu boot tebes. Andreas dehan, susesu sira ne’e akontese tanba hetan poiu hosi Governu no Povu Japaun nian.
Adreas mós hato’o agradesementu wa’in ba Povu no Governu Japaun nia tulun nune’e bele implementa projetu lubuk ida iha ne’ebé serbisu hamutuk entre CI ho UNDP. (CI)