Dili, Prezidente Conselho de Imprensa de Timor-Leste (CI), Virgilio da Silva Guterres, iha Abertura Sosializasaun Lei Komunikasaun Sosiál no Regulamentu sira CI nian ba Falintil - Forsa Defeza Timor-Leste (Falintil-FDTL) hatete agradese ba komando Falintil-FDTL tamba iha disponibilidade hodi koopera ho CI atu jornalista, mídia no forsa sira bele hala’o ida-idak nia kna’ar tuir lei.
“Forsa ninia atu hare ameasa husi liur, Polisia atu hare seguransa iha rai laran, iha momentu hanesan jornalista sira mós hala’o sira nia serbisu tanba hakarak garante direitu públiku ninian atu hetan informasaun. Esplika Chefe do Estado Maior General das Falintil-FDTL, Major General Lere Anan Timor, wainhira loke Sosializasaun kona-ba lei komunikasaun sosiál no regulamentu sira CI nian, iha salaun enkontru Falintil – FDTL, Fatuhada, Dili, tersa, loron 10/04/2018.
“Matéria ida ne’e ba ha’u matéria foun órgaun komunikasaun ninian, ita bele komunika mas ita la halo komunikasaun, iha ita nia instituisaun nia laran mós iha mídia maibé seidauk profisionál karik, tanba ne’e mak ha’u koordena ho Sr. Prezidente atu halo nusa mak ita serbisu hamutuk,” dehan Lere.
Lider Falintil – FDTL ne’e konsidera, papel jornalista atu fo informasaun hodi transforma povu nia moris, “ jornalista nia papél atu fó informasaun ba povu, ne’ebé sei iha nakukun laran lori sira ba naroman, ema sira ne’ebé la sivilizadu lori sira ba sivilizadu, ema ne’ebé la edukadu sai edukadu,” haktuir Lere.
Iha sosializasaun ne’e Diretór Diresaun Apoiu Juridiku no Liberdade Imprensa CI, Olderico da Kosta, esplika kona-ba Lei Komunikasaun Sosiál, no Regulamentu sira CI nian foka ba kna’ar jornalista, orgaun no meius komunikasaun sosiál hanesan kompania mídia, Radiu, TV, Imprimi no On Line no mós kna’ar CI hanesan Instituisaun Autónomu tuir lei nú. 25/201.
Iha sesaun diskusaun, partisipantes sira ho ativa tebes hato’o perguntas hanesan Kapitaun David Do Santos, husu kona-ba diretu privasidade, família fahe malu ka divorsiu tanba informasaun. Jornalista sira nia maneira hatais kontra etika no seluk tan.
Perguntas hirak ne’e resposta hosi Prezidente CI, Konselleiru CI no mós Diretora Ezekutiva CI kona-ba direitu públiku atu asesu informasaun, maneira hato’o notisia, etika jornalista iha públiku no liberdade jornalista ba kobertura.
Kuadru CI mos esplika kona-ba direitu ba resposta, sansaun ba parte ne’ebé taka dalan ba liberdade imprensa, sensura, gender no seluk tan.