Díli – Conselho de Imprensa de Timor-Leste (CI), hola parte iha semináriu ne’ebé organiza hosi Timor-Leste Press Union (TLPU) ho tema “Papél Mídia iha Eleisaun Antisipada,” iha salaun enkontru, Pusat Budaya Indonesia (PBI), Cai-Coli, Díli.
Conselho de Imprensa reprezenta hosi Konsilleiru, José Maria Ximenes, Diretora Ezekutiva, Ana Teresa Sequeira no Diretór Diresaun Komunikasaun Sosiál, Relasaun Institusionais no Kooperasaun, Altino da Cruz Freitas.
Iha okaziaun refere, Conselho de Imprensa hetan mós oportunidade hodi hola parte iha sesaun diskusaun, iha ne’ebé Konsilleiru José Maria Ximenes ko’alia kona-ba “Independénsia no Integridade Mídia iha Kobertura Eleisaun Antisipada”.
Konsilleiru dehan, iha tempu eleisaun hanesan agora dadaun, jornalista sira tenke hakruk nafatin ba kódigu Étika Jornalista sira nian nu’udar matadalan.
“Saída maka ita presiza kaer metin hanesan matadalan ne’ebé iha ona maka hanesan kódigu étika jornalista. Tema ne’ebé fó ba ha’u ne’e mós hanesan parte ida hosi kódigu étika jornalista,” hatete Konsilleiru José Maria.
Konsilleiru José rekoñese mós katak órgaun komunikasaun sosiál sira hasoru hela difikuldade finanseiru. Nia dehan jornalista nafatin buka meius oioin para bele hato’o nafatin informasaun ida ne’ebé independente no la inklina ba parte ida.
Husu mós ba jornalista sira atu prevene no hadook an hosi diskursu de ódiu, nune’e bele mantein nafatin independensia editorial hodi buka no halo balansu notísia sira hotu molok hatun ba públiku.
Entretantu Sekretáriu Estadu Konsellu Minístru no Komunikasaun Sosiál (SEKMKS), Matias Freitas Boavida hatete papél mídia importante tebes ba prosesu demokrasia iha Timor-Leste.
“Ha’u konkorda katak kna’ar mídia importante tebes atu bele hala’o kna’ar hodi asegura prosesu da demokrasia iha nasaun ida hanesan Timor-Leste,” Matias hato’o kestaun ne’e perante sesaun diskusaun.
Nia hatuta Governu labele fasilita vota ambulante ba jornalista sira desde hahú nia (SEKMKS) hala’o kna’ar, laiha biban oinsá atu ko’alia kona-ba lei elitoral tanba ita hasoru ímpase polítiku ida ne’ebé barak liu halo konfrontasaun iha Parlamentu Nasionál.
Iha biban Intervensaun, Diretora Ezekutiva CI, Ana Teresa Sequeira lamenta katak polítiku sira dalabarak ko’alia katak pap’el mídia ne’e importante maibé iha realidade polítiku sira rasik maka halo papél mídia la importante.
“Ita hare iha prosesu ne’ebé liu tiha ona, iha lei eleitorál ita boot sira la tau importánsia mídia nian. Ita boot sira halo alterasaun iha lei eleitorál iha eleisaun atesipada ita boot sira haluha tiha kna’ar mídia.”
“ita boot sira halo diskriminasaun, fó de’it ba RTTL,EP nomós polísia sira atu bele iha vota ambulante iha fatin ne’ebé nia ba halo kobertura,” Diretora dehan polítiku sira ejije atu mídia halo papél nu’udar kontrolu sosiál, atu hatudu akuntabilidade públiku nian, fó informasaun ne’ebé maka faktuál no aktuál, sé ita boot sira la asesu sira nian to’o iha área remotas. (CI)