Atividade

CI Esplika Polítika No Mekanizmu Estájiu Karteira Profisionál

CI Esplika Polítika No Mekanizmu Estájiu Karteira Profisionál

Dili, Prezidente Conselho de Imprensa de Timor-Leste (CI), Virgilio da Silva Guterres, hatete CI loke oportunidade ba jornalista sira atu rejista ba estajiu profisionál hodi hetan karteira profisionál jornalista.

“Atu informa ba meius ka órgaun komunikasaun sosiál sira katak, CI iha nia planu ba prosesu estajiu, tinan ida ne’e ita hahú anunsia katak rejistu ba estajiu hahú nakloke ba maluk sira atu rejista.”  Prezidente CI hato’o lia ne’e iha abertura enkontru loron sorin ho Diretór no Xefi Redasaun hosi Mídia Nasionál sira ne’ebé realiza iha Salaun Ministériu Obras Públikas – MOP, Caicoli, Dili, kuarta, 4 Abríl 2018.

Bazeia ba mandatu legál hirak ne’ebé mensiona iha Lei Komunikasaun Sosiál Nú 25/2014 no Regulamentu Nú. 6/2017 fó Kompeténsia ba Conselho de Imprensa de Timor-Leste hodi fó títulu profisionál ba jornalista liu husi atribuisaun karteira profisionál jornalista. Nune’e mós Regulamentu Nú. 7/2017 fó mandatu ba CI hodi aplika estájiu jornalístiku ba jornalista sira atu bele hetan karteira profisionál referee.

Diretór Diresaun Dezenvolvimentu Analiza Mídia CI, Alberico da Costa Junior, esplika kona-ba mekanizmu e  stajiu ne’ebé inklui komponente sira hanesan prosesu estajiu, períodu estajiu, matéria estajiu, izame no seluk tan. Jornalista ne’ebé akaba eskola sekundaria tenki tuir estagiu profisionál durante fulan 18, finalista universidade laos hosi fakuldade komunikasaun sosiál estajiu fulan 12 no finalista hosi fakuldade komunikasaun estajiu profisionál durante fulan 6. Regra ne’e aplika ba jornalista ne’ebé serbisu seidauk too tinan lima wainhira lei komunikasaun sosiál hahu implementa.

Iha sesaun husu no hatan, Diretór Informasaun Grupo Média Nasional, Fransedez Suni, husu kona-ba ba tipu estajiu obrigatoriu ou volontariu, enquantu partisipantes seluk husu kona-ba kategoria izame, kooperasaun CI ho Sentru Treinamentu Jornalismu, karteira profisionál ho salariu ba jornalista no prekupasaun seluk tan.

Resposta ba kestaun hirak ne’e, Prezidente CI, Virgílio da Silva Guterres, hatete antes ne’e CI iha hanoin atu fo izame ba jornalista hosi nivel junior, mediu no primariu maibé tuir lei komunikasaun sosiál iha deit fase rua ne’ebé ida estajiu no izame profisionál.

Koalia kona-ba salariu ba jornalista sira, CI konsideira ne’e kompetensia mídia nain sira atu valoriza jornalista sira nia serbisu tamba serbisu jornalismu nu’udar profisaun profisionál ne’ebé tuir lolos la bele simu salariu basiku hanesan trabalhadores em geral kada fulan salariu dolares atus ida sanulu resin lima ($ 115,00).

Hafoin remata primeira seisaun kuntinua kedas ho sesaun atribuisaun sertifikadu Fixa Rejistu ba mídia nasionál 6 ne’eb’e regista ona iha CI.Membru CI, Konselleiru, Jose Maria Ximenes, hatete CI hala’o nia kna’ar bazeia ba Lei Komunikasaun Sosiál hodi rejistu no atualiza base de dadus ba órgaun no meius komunikasaun sosiál sira.

“Conselho Imprensa loke oportunidade atu mídia sira bele rejista, ami loke iha Setembru 2017, iha órgaun no meius komunikasaun 9 maka rejistu maibé iha 6 maka aprovadu tanba tuir kriteria.” Esplika Jose Maria Ximenes.

Reprezenta mídia nain, Suzana Cardoso, espresa nia hanoin kona-ba simu Fixa Rejistu ne’ebé atribui hosi CI, “apresia tebes tanba bele hetan ona Fixa Rejistu hosi Conselho de Imprensa.

”Mídia 6 ne’ebe mak hetan Fixa Rejistu hosi CI maka hanesan Jornál Independent, GMN, Mídia One Timor, The Dili Weekly, Agora Tempo Intermídia no Jornál Timor-Post.