Atividade

Jornalista Labele Ta’uk Hala’o Kobertura Iha Tribunal

Jornalista Labele Ta’uk Hala’o Kobertura Iha Tribunal

Dili, Lawyer hosi Da Silva Lawyer, Nuno Marrazes, hatete jornalista labele ta’uk atu halo kobertura ka foti informasaun hosi prosesu julgamentu ou prosesu sira seluk ne’ebé akontese iha tribunal.

“Jornalista iha knaar ka responsabiliza hanesan ho Juis sira iha tribunal,  labele hare pozisaun juis sira iha Ramelau tutun no ita jornalista sira iha kraik tanba  Juis foti desizaun e Nome do povo jornalista mós hanesan tanba ne’e tenke barani no lalika ta’uk”. Nuno Marrazes hato’o korazen ne’e ba partisipantes kursu jornalizmu kompriensivu ba fase datoluk, ne’ebé organiza hosi UNDP no Conselho de Imprensa.

Nuno Marrazes mós esplika katak, Jornalista tenke organiza an hodi hetan konfiansa iha sosiedade tanba ne’e jornalista tenke halo separasaun ne’ebé klaru ba prezunsaun inosénsia arguido sira nian iha prosesu tribunal, se mak kondenadu no parte ne’ebé mak sai vítima hodi la estraga ema seluk nia naran di’ak. Jornalista mos tenke apar ho liafuan hirak ne’ebé baibain Juis sira uza iha prosesu sira ne’ebé lao iha tribunal.

Iha oportunidade ne’e jornalista internasionál hosi Australia, Bob Howarth, hatete jornalista tenke halo kontaktu ou aprosimasaun ho mídia officer ka funsionáriu ne’ebé senior iha tribunál nune’e bele hetan informasaun, entrevista, gravasaun ka dokumentus hirak ne’ebé importante kona-ba julgamentu kasu ruma iha tribunál.

Bob Howarth mós rekomenda atu iha futuru presiza iha treinamentu kona-ba espasu ba jornalista iha tribunal, treinamentu ba polísia kona-ba kobertura jornalista iha tribunál no seluk tan. Bob Howarth mós fahe ninia esperiénsia seluk kona-ba kobertura iha tribunal inklui nia esperiénsia rasik tenke hatán iha tribunál relasiona ho notísia balun ne’ebé públika iha ninia mídia.

Partisipantes treinamentu intensivu, Acasio Pinto, hosi Mídia Jornál Timor-Post, partisipa ativu hodi husu perguntas relasiona ho kobertura iha Tribunal, hanesan oinsá bele hasoru dezafiu iha hasai photo ka kobertura iha Tribunal tanba sempre iha intervensaun hosi seguransa satan halo kobertura ba prosesu julgamentu iha sala julgamentu.

Treinadór Internasionál hosi Australia, Bob Howarth hatán perguntas ne’e ho esplika oinsá jornalista bele halo kobertura ho di’ak no kle’an iha Tribunal, esplika mós maneira sira ne’ebé jornalista bele uza iha halo kobertura iha Tribunal iha hetan dadus no entrevista ho loloos katak jornalista tenke hala’o nia knaar bazeia ba kode étika jornalista nian no Nuno Marrazes nu’udar lawyer hosi Da  Silva Lawyers,  hateten katak jornalista tenke hatene mós prosedimentu sira ne’ebé mak implementa hosi parte Tribunal nian relasiona ho pasa informasaun ba jornalista.

“Prinsipalmente iha nasaun ida, photo ka hasai film, presiza hetan lisensa,” dehan Bob Howarth. 

Matéria treinamentu Jornalizmu Kompriensivu ba datoluk, hala’o espesífiku ba tema Kobertura Iha Tribunal ho oradór Internasionál  jornalista hosi Australia, Bob Howarth no Nuno Marrazes, iha salaun enkontru Hotel Ramelau, loron 15/03/2018, hodi esplika kona-ba maneira sira ne’ebé jornalista bele uza iha halo kobertura iha Tribunal, atu hetan dadus, entrevista, hetan gravasaun audio, oinsá hasai fotografia, filmagen no mós oinsá hakerek informasaun ne’ebé di’ak no loloos.