Dili, Membru CI, Konselleiru Paulo Araujo, apela ba jornalista no editor sira atu labele uza fontes informasaun hosi mídia sosiál ba hakerek notísia wainhira seidauk halo verifikasaun ka cross checking ba informasaun hirak ne’e. Paulo Araujo hato’o apelu ne’e wainhira reprezenta Prezidente Conselho de Imprensa ko’alia iha workshop ho tema “Hametin Reportajen Balansu Liuhusi Dixiplina Verifikasaun” ne’ebé hala’o iha salaun Conference D, UNDP, Obrigadu Barak, Dili, Tersa-feira, 20/03/2018.
“Mídia sosiál, fenómenu ida ne’ebé la’ós ema profisionál de’it mak bele asesu maibé ita hotu bele asesu, objetivu informasaun ne’e sempre kustante, liu minutu balun informasaun muda tiha ona, bele notísia foun, bele notísia tebes, bele notísia falsu, bele ema nia hanoin, ema nia opiniaun muda lailais, nia impaktu iha sosiedade ne’e maka’as, nune’e importante ba Conselho Imprensa ba hare ida ne’e.” Hatete Paulo Araujo ba partisipantes sira.
Konselleiru Paulo hatutan katak, prezensa oradór prinsipál jornalista hosi Australia, Bob Howart, atu esplika kana-ba oinsá jornalista no xefe editor sira bele halo cross checking ka verifika informasaun hirak ne’ebé ema fó sai iha mídia sosiál molok mídia profisionál sira públika informasaun referee.
“Bob sei ko’alia tanba iha ita nia mundu jornalista ne’e iha regras, regras sira mak hanesan cross checking, iha verifikasaun sira, liu husi xefe redasaun, ho impaktu sira ohin hau dehan ne’e, halo nusa mak ita bele hasoru ida ne’e, halo nusa mak ita bele hametin ema nia fiar ba ita hanesan jornalista.” Esplika konselleiru Paulo Araujo.
Iha oportunidade hanesan, Advisor Tekniku Eleitoral UNDP Timor-Leste, Andreas Del Castilo, agradese ba partisipasaun partisipantes sira iha workshop ne’e, “ hanesan ohin kolega Paulo hatete importante, loro-loron ita hare notísia, ita rona iha fake news (notísia falsu), iha nasaun hanesan Amérika, Rusia e Europa iha notísia falsu espesiál iha eleisaun, problema iha sosiál mídia, iha notísia barak, lailais, bainhira ita loke ita nia Facebook, ita nia twitter, iha notísia barak la konfirma autentisidade, fontes hosi ne’ebé, verdadeira ou lae.”
Iha workshop ne’e oradór prinsipál Jornalista Internasionál hosi Australia, Bob Howarth, aprezenta matéria sira hanesan Mídia sosiál nia perigu, Direitu Internasionál kona-ba kopia ka International Copy Right, Reportajen balansu iha eleisaun no Notísia falsu ka fake news.
Workshop ne’ebé realiza hosi Conselho de Imprensa de Timor-Leste (CI) no UNDP Timor-Leste ne’e partisipa jornalista sira hosi mídia imprime, radio, televizaun, online, freelance inklui universitáriu hosi UNTL no UNITAL, ho total partisipantes 63, feto 26 no mane 37.