Dili, Prezidente Conselho de Imprensa de Timor-Leste (CI), Virgílio da Silva Guterres, hatete aniversáriu Conselho de Imprensa ba daruak iha loron 10 fulan Maiu tinan 2018, tuir loloos sei hala’o ho atividade durante loron rua hahú loron 10 to’o loron 11 fulan Maiu tinan 2018 maibé tenke adia ka muda ba loron 28 no 28 fulan Maiu tinan ne’e tanba realizasaun eleisaun antisipada ne’ebé planeia hala’o iha loron 12 fulan Maiu tinan 2018.
“Aniversáriu CI atu realiza iha dia 10 de Maiu besik liu iha eventu nasionál tanba ne’e adia ba 29 Maiu, hato’o dezafiu balun ne’ebé CI enfrenta, hato’o mós saida mak ita nia meius komunikasaun sira enfrenta,” informa Prezidente CI ba jornalista sira, hafoin hamutuk ho Membru CI no Ezekutiva CI, hala’o enkontru kortejia ho Prezidente Repúblika, Francisco Guterres Lú Olo, iha Palasiu Prezidente Dili, iha sexta-feira, 16/03/2018.
Enkontru ne’e hodi informa kona-ba serbisu CI nian hanesan planu ba realizasaun II Dies Natalis CI no Dili Dialogu Forum ne’ebé sei partisipa bainaka hosi responsavel ka kuadru Conselho de Imprensa hosi rejiaun Azíatiku no Pasífiku.
Virgílio da Silva esplika katak, enkontru ne’e koalia mos asuntu seluk kona-ba kooperasaun entre Conselho de Imprensa ho PNTL no Falintil – FDTL hodi sosializa lei komunikasaun sosiál, lei hodi regula mídia non lukrutivu sira, direitu antena ba Partidu Polítiku sira atu hato’o sira nia programa durante kampaña eleitorál, edifísiu CI, knaar CI no seluk tan.
Asuntu seluk ne’ebé ko’alia mos iha enkontru ne’e mak hanesan Prezidente CI rekomenda atu iha loron nasionál sira ekipa protokolu hosi parte estadu tenke koloka fatin espesífiku ba jornalista atu halo kobertura hanesan hasai filmagen, fotografia, grava audio no seluk tan.
Virgílio da Silva Guterres hatete, iha enkontru ne’e Xefi Estadu deklara prontu atu partisipa hodi ensera atividade Dili Diálogu Forum ne’ebé Conselho de Imprensa sei realiza durante loron rua, ne’ebé sei remata iha loron 29 fulan Maiu tinan 2018, hodi komemora aniversáriu CI ba daruak inklui fo atensaun ba asuntu seluk ne’ebé Prezidente CI aprezenta durante enkontru ne’e.
Forum Diálogu Dili tinan 2018 ne’e ho tema: Hametin Mekanizmu Auto-Regulasaun Mídia iha Rejiaun Sudeste Aziátiku no Pasífiku ne’ebé sei diskute kona-ba Kria Forum Conselho de Imprensa ba Rejiaun Sudeste Aziátiku no Pasífiku, Kria mekanizmu/ matadalan (regional guidellines) atu ajuda proteze Jornalista sira ne’ebé hala’o nia kna’ar iha rejiaun ida ne’e no mós esplora estratejia advokasia saída mak órgaun auto-reguladora komunikasaun sosiál iha rejiaun atu hasoru hoax, fake news iha mídia sosiál.
Iha fulan Maiu tinan 2017 Conselho de Imprensa organiza konferénsia internasionál nivel rejionál kona-ba Promove Liberdade Imprensa no Liberdade Espresaun no mós selebra ninia aniversáriu ba dahuluk nian, ne’ebé iha tersa, 9 Maiu 2017 CI realiza forum nasionál foka liu ba hametin relasaun institusionál hodi promove liberdade imprensa no liberdade espresaun. Enkuantu iha Kuarta, 10 Maiu 2017 CI kontinua hala’o forum internasionál hare liu ba dezafiu iha luta ba liberdade imprensa no liberdade espresaun iha rejiaun Sudeste Aziátiku no Pasífiku.