Conselho de Imprensa de Timor-Leste (CI), hala’o Sosializasaun kona-ba Lei Komunikasaun Sosiál no Regulamentu sira CI nian liuliu Regulamentu Diretus Resposta no Retifikasaun no mós Media Cyber ba Polísia Nasionál Timor-Leste-PNTL .
Prezidente Conselho de Imprensa de Timor-Leste (CI), Virgilio da Silva Guterres, esplika katak objetivu Sosializasaun ne’e atu fahe informasaun kona-ba jornalista sira nia kna’ar no mós oinsá uza direitu ba resposta, “atu fahe informasaun ba maluk Polísia sira, informasaun iha rua, ida mak oinsá maluk jornalista sira hala’o sira nia knar no ida seluk mak oinsá uza diretu de resposta,” esplika Prezidente CI wainhira halo abertura ba sosializasaun lei komunikasaun sosiál no regulamentu sira Conselho de Imprensa nian, iha salao academia PNTL Comoro, Dili, iha loron 13/03/2018.
Prezidente CI hatutan, CI durante ne’e halo ona enkontru ho parte Komando Gerál PNTL hodi koalia kona-ba kooperasaun entre instituisaun rua hodi asegura kna’ar jornalista nomos kna’ar hosi parte Polisia, “ iha enkontru dala hira ho Komandante Jerál, hau sempre hatete, profisaun rua ne’e hala’o knar relasiona ho Interese povu, Polísia nia serbisu atu mantein seguransa ba públiku e jornalista sira garante informasaun loloos no momoos ba públiku, tanba ne’e mak sira tenke hetan asesu ba instituisaun publika sira hdi fahe ba públiku , wainhira parte rua la intende malu dala ruma mosu desintendementu, tanba ne’e maka halo Sosializasaun hodi fahe informasaun.” Eplika Prezidente Conselho de Imprensa.
Segundu Komandante, Komisáriu Faustinu da Costa, iha nia intervensaun hodi loke Sosializasaun ne’e haktuir katak Polisia no Jornalista sira tenki hatene ida-idak ninia kna’ar nune bele halo kooperasaun ne’ebé diak atu evita konflitu entre PNTL ho Jornalista sira iha terenu. “Ho Sosializasaun ne’e, PNTL sira hatene saida mak jornalista sira halo, tenke halo no labele halo, importante atu hatene, mínimu tenke komprende, tanba ezije kooperasaun ne’ebé di’ak, Kuandu intende no hatene ho di’ak,kooperasaun sei la’o di’ak, sei evita konflitu entre ita,” dehan Segundu Komandante, Komisáriu Faustinu da Costa .
Iha sesaun diskusaun, partisipantes sira ativa iha husu perguntas sira kona-ba dadus ne’ebé jornalista públika balun sala, asuntu dereitu no resposta, públikasaun imagen la hanesan ho notisia, kasu defamasaun, sansaun ba jornalista no seluk tan.
Sosializasaun ne’e partisipa hosi ofisiais PNTL sira hosi Comando Geral PNTL, Ofisiais Polisia Munisípiu Dili, Postu Administrativu, UPF, UPM no seluk tan, hamutuk ema 56.
Sosializasaun ne’e hala’o ona iha munisípiu 12 inklui regiaun espesial Oecusi, ne’ebé hahu iha loron 12 fulan Setembru 2017 too fulan Outubru tinan 2017, ne’ebé partisipa hosi jornalista, mídia nain, lideres lokál balun, autoridade local, sosiadade civil no seluk tan.
Enquantu tinan ne’e Conselho de Imprensa kuntinua hala’o sosializasaun ba lei komunikasaun sosiál no regulamento CI nian ba PNTL, Falintil-FDTL inklui instituisaun relevantes sira seluk. Sosializasaun ne’e rasik atu aumenta jornalista, órgaun no meius komunikasaun sosiál no públiku kona-ba lei komunikasaun sosiál no regulamentu sira CI nian inklui públiku bele hatene kona-ba kna’ar jornalista, Mídia no kna’ar Conselho de Imprensa hodi kontribui ba garantia liberdade imprensa no liberdade espresaun iha Timor-Leste.