Díli, 28/02 – Conselho de Imprensa de Timor-Leste (CI), hamutuk ho United Nation Development Programme (UNDP), asina akordu kooperasaun ho Rádiu Televizaun Timor-Leste, Empreza Públika (RTTL,EP), kona-ba programa treinamentu “Jornalízmu Komprensivu iha Síklu Eleitorál Timor-Leste,” ne’ebé iha mós sesaun ida kona-ba debate televizivu, iha edifísiu RTTL,Ep, Caicoli, Díli.
Hafoin asina akordu, Prezidente CI, Virgílio da Silva Guterres, ba jornalista sira Hatete asina akordu kooperasaun kona-ba debate televizivu nian, tamba ne’e CI serbisu hamutuk ho RTTL,EP ne’ebé hola papél mós nu’udar órgaun uniku atu fahe informasaun no mós atu partisipa prosesu edukasaun. Programa debate televizivu ne’e sei hahú iha fulan Marsu to’o Desembru tinan 2018 ho epeizódiu 20 ne’ebé epizódiu 10 responsabiliza hosi UNDP no mós seluk hosi CI.
“Hakarak fó hatene katak ida ne’e la'o tamba hetan apoiu finansiamentu hosi UNDP, ne’ebé orsamentu mai hosi Governu Japaun, tamba ne’e liu hosi oportunidade ne’e ami hakarak agradese ba UNDP, no mós agradese ba Prezidente RTTL Ep, ne’ebé disponibiliza atu halo akordu ne’e,” dehan Prezidente CI.
Oras ne’e dadaun, CI ho UNDP, hala’o hela formasaun intensivu ba jornalista sira hamutuk na’in 25 ne’ebé mai hosi órgaun komunisaun sosiál sira hanesan televizaun, rádiu, jornál, online no rádiu komunidade. Iha formasaun ne’e sei akontese mós debate televizu ne’ebé liuhosi akordu ne’ebé estabelese ona maka sei halo transmisaun hosi kanál RTTL,EP.
Nia dehan, Importante liu tan, tamba pakote ne’e mosu mós iha periode ne’ebé ke TL infrenta iha prosesu eleisaun antisipada nian. “Tamba ne’e tempu ne’ebé oportunu ba jornalista sira ne’ebé ke mai tuir kursu ne’e atu aproveita oportunidade atu diskute mós kona-ba asuntus sira ne’ebé relasiona ho promesa hosi komprímisiu polítiku sira iha tempu kampaña nomós sira nia komprímisiu bainhira sira kaer ukun,” nia hateten.
Iha fatin hanesan, Prezidente Conselho Administrasaun RTTL EP, Gil da Costa, dehan asina akordu ne’e importante atu serbisu hamutuk entre CI ho RTTL hodi fó Treinamentu ida ba Jornalista sira, liu-liu debate públiku bele akontese iha Nasaun ne’e.
“Ha’u sente ida ne’e importante atu eduka editór sira, la’ós sira de’it maibé mós ba jornalista sira atu hala’o sira nia papél ho di’ak, kredibel, balansu, nomós imparsiál. Tamba ne’e ha’u sente treinamentu ida ne’e importante atu kadi ita nia kakutak par jornalista sira oinsá bele husu ema ho krítiku maibé balansu mós,” hatete Prezidente RTTL.Ep.
Tuir nia ema hotu hatene katak eleisaun antisipada ne’e jornalista mak sei determina mós ba polítika iha rai laran, tamba ne’e mak importante editór no jornalista sira atu atende ba treinamentu hirak ne’e.