Atividade

ELEMENTU 10 JORNALIZMU NIAN - BILL KOVACH & TOM ROSENSTIEL

ELEMENTU 10 JORNALIZMU NIAN - BILL KOVACH & TOM ROSENSTIEL

Dili, Iha enkontru ho Xefi Redasaun no Editor Mídia sira, hodi enkoraja no deskuti atividade jurnalizmu iha hasoru prosesu eleisaun antisipada, iha salaun Fundasaun Oriente foin lalais ne’e, Prezidente Conselho de Imprensa de Timor-Leste CI), Virgílio da Silva Guterres, esplika detalu sobre elementu 10 jurnalizmu  ne’ebe foti hosi livru ne’ebé hakerek hosi Bill Kovach no Tom Rosenstiel.

Prezidente CI hatete, jornalista nia kna’ar importante tamba ne’e tenki iha lealdade ba sidadaun sira, laos ba grupo no partidu polítiku sira, “lealdade jornalista nian ba sidadaun, ida ne’e importante iha eleisaun, ita la loyál ba polítiku ida, ba organizasaun ida ou ba grupu ida maibé ita loyál ba ita nia sidadaun liu-liu ita nia pembaca (leitor sira), ita nia rona nain sira ho hare nain sira, ita loyal ba sira, ita sempre buka fó informasaun ida ne’ebé loos, informasaun ida ne’ebé kualidade.”

Virgílio da Silva Guterres esplika katak, iha prosesu ba eleisaun jornalista sira tenki halo verifikasaun ba faktus notisia ruma antes fo sai ba públiku, “dixiplina verifikasaun katak hau hetan faktu ida, la’ós mak ne’e ona, hau fo sai kedas, hau presiza verifika liuliu faktu sira ne’ebé involve kontradisaun, involve akuzasaun, ou implika ema seluk sente laran kanek, entaun iha situasaun eleisaun ita hotu hatene katak partidu sira sei ataka malu, sei kritika malu, lider balu sei kritika lider seluk partidu ninian.”

Elementu 10 jurnalizmu ne’ebé apresenta iha semínariu ne’ebé halao iha loron 16/02/2018 kompostu hosi; 1. Jornalizmu nia obrigasaun primeiru ba lia-loos [verdade], 2. Lealdade jornalizmu nian mak ba sidadaun sira, 3.Esénsia jornalizmu nian mak displina verifikasaun, 4. Jornalista tenke mantein independénsia husi ema ne’ebé sira kobre, 5. Jornalista tenke serbí nu’udar kontroladór independente ba sira ne’ebé iha podér, 6. Jornalizmu tenke hamosu forum públiku ba krítika no komentáriu husi públiku, 7. Jornalimzu tenke esforsu hodi halo buat importante sai intersante no relevante, 8. Jornalizmu tenke asegura ninia notisia kompriensivu no proporsionál, 9. Jornalista iha obrigasaun atu tuir ninia konsiensia no 10.Sidadaun sira mós iha direitu no responsabilidade ba asuntu sira ne’ebé relasiona ho notísia.