DILI, 08/02 - Prezidente Conselho de Imprensa de Timor-Leste (CI), Membru CI no Ezekutiva, hala’o enkontru kortejia ho Xefe Estadu Maior Generál Falintil-FDTL, Major Jenerál, Lere Anan Timur, iha kuartél Jerál F-FDTL, Fatuhada, Kinta-Feira semana ne’e.
Iha enkontru ne’e, aprezenta serbisu balun ne’ebé durante ne’e Conselho de Imprensa halo ona no diskute mós kona-ba serbisu hamutuk entre Conselho de Imprensa ho Falintil-FDTL iha futuru.
Hafoin hasoru malu, Prezidente Conselho de Imprensa de Timor Leste, Virgílio da Silva Guterres, esplika objetivu sorumutu ne’e ba jornalista sira.
“Tanba iha serbisu balun, ne’ebé ke halo sektór rua ne’e sempre hasoru malu, entaun iha entendimentu entre maluk Jornalista sira ho maluk sira ne’ebé serbisu iha forsa, inklui seguransa sira, iha ida-idak nia papél, hau hanoin iha liña koordenasaun ne’ebé di’ak iha parte rua ne’e bele serbisu hamutuk ho diak kuandu iha kampu,” dehan Prezidente CI.
Estrutura Conselho de Imprensa ne’e mós informa ba Komandante no mós lider Maximu iha Falintil-FDTL katak dala ruma kapasidade jornalista atu halo interpretasaun ba deklarasaun sira ne’e sei menus hodi afeta ba kontiudu notisia, entaun husi Conselho de Imprensa husu, deklarasaun sira ne’ebé atu hato’o ba públiku, se bele hakerek ou koalia karik bele badak de’it, atu Jornalista sira mós fasil halo transkrisaun ikus mai sai notísia.
“ Ami mós hakarak atividade sira ne’ebé forsa sira halo iha komunidade sira nia let, hetan kobertura ida ne’ebé apropriadu husi ita nia Mídia sira”, nia informa.
Prezidente CI, aproveita oportunidade ne’e husu ba Meius Komunikasaun Sosiál hodi tau atensaun ba halo kobertura kona-ba atividade sira ne’ebé forsa F-DTL sira halo, hanesan daudaun husi parte enjeñeira sira halo hela serbisu iha komunidade, hadi’a eskola balun.
“ Ita labele hein de’it bainhira F-FDTL sira halo problema mak ita fó sai maibé kuandu sira halo serbisu iha sosiedade mós ita tenke halo kobertura”, Prezidente CI reálsá.
Nune’e mós, Xefe Estadu Maior Generál Falintil-FDTL, Major Generál Lere Anan Timur, dehan prezensa Prezidente CI ho estrutura Conselho de Imprensa mai ne’e, ko’alia uitoan kona-ba Falinti;-FDTL nia Mídia oinsá bele serbisu hamutuk no mós ko’alia kona-ba oinsá garante seguransa ba mídia sira.
“Hau mós ko’alia uitoan kona-ba Jornalismu sira nia serbisu, nia devér, nia papél, perante sosiedade, tanba jurnais balun esklarese ema no balun fahe ema no kria problema,” Lere esplika.
Major Jenerál, Lere Anan Timur, nia hanoin aban bainrua Instituisaun Falintil-FDTL nia Mídia no Mídia Nasionál ba oin sei serbisu hamutuk.
Nia mós esplika Jornalista sira dala barak preokupa sira nia seguransa, maibé tuir Lere, forsa armada tantu polísia iha Nasaun ne’e atu fó protesaun ba kualkér sidadaun, kualkér serbisu ne’ebé ke Estadu nian, ne’ebé ke Nasaun nian, tanba ne’e lalika preokupa kona-ba seguransa ne’e tanba Forsa garante nafatin.
“ Ami mós ko’alia uitoan kona bá Eleisaun Antisipada, ida ne’e situasaun ida ne’ebé diferente, tanba ne’e Mídia tenke halo kobertura ida ne’ebé nia membru sira tenke hatudu nia neutralidade, labele halis ba partidu ida no favorese ba partidu ida, I Mídia tenke fahe informasaun, eduka ema, I halibur ema”, Lere husu.
Iha Enkontru ne’e mós Prezidente Conselho de Imprensa de Timor Leste, esplika sobre serbisu no progresu balun ne’ebé durante ne’e halo ona ba Xefe Estadu Maior Generál Falintil`-FDTL.**