CI Sei Koopera ho Embaixada Indonézia Iha TL

CI Sei Koopera ho Embaixada Indonézia Iha TL

Atividade Hare nain: 5805

DILI, 22/01 – Conselho de Imprensa de Timor-Leste (CI) sei koopera ho embaixada Indonézia iha Timor-Leste hodi bele implementa hamutuk programa sira hanesan treinamentu ba jornalista, estudu komparativu no semináriu internasionál sira.

Diretór Diresaun Komunikasaun Sosiál, Relasoens Institusionais no Kooperasaun (DCSRIC), Altino Freitas hatete CI husu ba embaixada Indonézia iha Timor-Leste atu bele asina hamutuk memorandum ruma entre parte rua hodi implementa programa treinamentu no estudu komparativu ba jornalista sira hodi bele hasa’e kapasidade rekursu umanu iha area mídia nian.

“Ami mai ho objektivu ida katak, sé embaixada fó oportunidade ita bele halo asina memorandum ida hodi nune’e bele implementa programa sira hanesan, treinamentu ba jornalista sira, halo semináriu internasionál sira, nomós halo estudu komparativu sira atu bele aumenta kapasidade Rekursu Humanu iha Timor Leste, liu-liu iha serbisu mídia nian,”  Diretór altino hato’o kestaun ne’e bainhira enkontru ho embaixadór Indonézia ba Timor-Leste, iha loron Kinta-Feira (18/01), iha Embaixada Indonézia, Faról-Díli.

Iha biban enkontru ne’e, DCSRIC, Altino Freitas esplika mós ba embaixada kona-ba ejisténsia Conselho de Imprensa no serbisu sira ne’ebé konsege CI halo ona durante mandatu tinan ida resin inklui mós formasaun sira ne’ebé CI hetan apoiu hosi kooperasaun serbisu sira.

Entretantu Embaixadór Indonézia ba Timor-Leste,Sahat Sitorus hatete Timor-Leste hanesan nasaun ida iha hela prosesu dezenvolvimentu, presiza tebes serbisu mídia nian nune’e bele dada investor boot sira bele mai investe iha TL.

Sahat louva tebes inisiativa CI nian ne’ebé bele vizita ona embaixada indonézia nune’e bele diskuti hamutuk serbisu sira ne’ebé sei hala’o hamutuk ba futuru.

“Obrgadu ba imi nia vizita mai ne’e atu saída maka ita bele ajuda, fatin halo semináriu, treinamentu, no ba oin ita halo vizita hanesan estudu komparativu ruma, hanesan Conselho de Imprensa Timor-Leste ba Indonézia, no ha’u gosta relasaun di’ak ho jornalista,” Sahat esplika.

Nia dehan papel mídia importante tebes ba nasaun rua hanesan TL ho Indonézia no ninia povu rasik, tanba ne’e jornalista sira merese duni atu hetan Kapasitasaun nune’e bele aumenta nafatin sira nia kapasidade.

Nia mós aseita tebes planu no programa ne’ebé hato’o hosi Conselho de Imprensa rasik, no planu sira ne’e mesak importante, nune’e nia rasik sei hare saida maka nia bele ajuda hodi implementa programa hirak ne’e.