Díli – Lori jornalista Timoroan tomak ne’ebé simu ona karteira profesionál, António Dias, hato’o agradese wa’in ba Estadu Timor-Leste, I-VII Governu Konstitusionál liuhosi Sekretáriu Estadu Komunikasaun Sosiál no Conselho de Imprensa de Timor-Leste ne’ebé nunka haluha serbisu jornalista sira nian.
“Hodi jornalista tomak ne’ebé simu primeiru karteira professional hosi primeiru Conselho de Imprensa Timor-Leste ninian hakarak agradese esforsu boot ne’ebé halo ona hosi Estadu Timor-Leste hamutuk ho Governu TL, hahú hosi I-VII Governu Konstitusionál.”
“Espesiál ba Sekretáriu Estadu Komunikasaun Sosiál hamutuk ho Conselho de Imprensa ba esforsu boot sira hotu ne’ebé sira halo atu ita hotu mai iha fatin ida ne’e, hahú kapítulu foun ida iha istória jornalízmu nian iha ita nia rain doben ida ne’e,” reprezentante jornalista, António Dias hato’o kestaun ne’e iha diskursu serimónia atribuisaun karteira professional ba jornalista Timoroan sira, iha loron Kuarta-Feira, 20/12/2017, iha Delta Nova, Dili.
António Dias hato’o agradese wa’in no parabens ba Estadu no Governu Timor-Leste liuhosi Conselho de Imprensa ne’ebé nunka haluha jornalista nia papel.
Ho orgullu boot, António Dias hamutuk ho jornalista sira fó ónra boot ba Dr. Ramos Horta, Kay Rala Xanana Gusmão, no sira ne’ebé mate iha prosesu luta independénsia, tanba liuhosi sira nia korajen maka enkoraja jornalista sira hotu hodi foti profisaun ida ne’e.
António mós husu ba jornalista sira hotu atu labele tabele ba poder polítiku ka poder ekonómiku ruma, jornalista sei tabele de’it ba nia profesionalízmu rasik, ho nune’e ita (Jornalista) bele realiza sira ne’ebé mate ona ne’ebé simu mós sertifikadu de Ónra postumu, nune’e bele hari ita nia sosiedade ida demokrátiku, Onestu no justísa social ba Timoroan hotu.
Mensajen Jornalista professional sira nian ba na’in mídia sira iha Timor Leste, “karteira professional jornalista nian ne’ebé ohin ami simu sei dodok leet de’it iha ami nia karteira laran, sé imi la tulun ami atu sai professional liutan”.
Tuir Lei komunikasaun Sosiál, Artigu 44, fó kompeténsia ba Conselho de Imprensa maka atu atribui karteira professional ba jornalista sira. Artigu hosi lei ne’e mós fortifika hosi regulamentu CI nian nú 6/2017, Artigu 3 kona-ba títlu professional jornalista nian.
Partisipa iha eventu ne’e, Laureadu Nobel da Pas, Antigu Jornalista, Dr. Jose Ramos Horta, Sefi Kaza Sivil Prezidensia Repúblika, Dr. Francisco Maria de Vas Conselhos, Adjunda Prokuradora Jerál da Repúblika, Dra. Zelia Trindade, Sekretáriu Estadu Konsellu de Ministru no Komunikasaun Sosiál, Dr. Matias Freitas Boavida, Jornalista naran boot, Sr. Max Sthal, Prezidente Autoridade Nasionál Komunikasoens, Eng. António Brígido Correia, Prezidente CI, Sr. Virgílio da Silva Guterres no Membru sira, konvidadus no parseiru CI nian, patrosinadu sira, família joralista sira ne’ebé mate ona no maluk jornalista sira hotu. (*)