Díli – Conselho de Imprensa de Timor-Leste (CI), atribui sertifikadu de ónra no rekoñesimentu postumu ba jornalista onoráriu internasionál no nasionál hamutuk na’in 11 ne’ebé fó ona sira nia vida iha mundu jornalízmu nian.
Sertifikadu de ónra no rekoñesimentu postumu ne’e CI entrega liuhosi serimónia atribuisaun profisionál ho tema “Jornalista Profesionál, Garante Kualidade Produtu Jornalístiku”, ne’ebé realiza iha loron 20 Dezembru 2017, iha Salaun Delta Nova, Díli.
Jornalista internasionál no nasionál na’in 11 ne’ebé simu sertifikadu de ónra no rekoñesimentu postumu hanesan Roger East (Australian Associated Press), Malcolm Harvie Rennie (TV. Chanel 9), Francisco Borja da Costa, Gregory John Shackleton (TV.
Chanel 7), Gary James Cunningham (TV. Chanel 7), Brian Raymond Peters (TV. Canel 9), Anthony John Stewat (TV. Canel 7), Kamal Ahmed Bamadhaj (Columnist for Asian Time), Sander Robert Thoenes (Financial Times), Joaquim Bernardino Guterres (Rádiu Matebian, Jornál Vox Populi).
Liuhosi plenária aberta iha salaun Delta Nova, Prezidente CI, Virgílio da Silva Guterres, hamutuk ho membru sira halo leitura ba deliberasaun rua, Primeiru ba jornalista sira ne’ebé mate ona, Segundu maka ba jornalista sira ne’ebé sei moris.
“Deliberasaun ida ba maluk sira ne’ebé mate ona, jornalista hosi rai laran ema na’in rua (2), ida mate iha 1975 (Francisco Borja da Costa), ida mate iha 1999 (Joaquim Bernardino Guterres). Sira seluk jornalista hosi tasi balun ne’eba, inklui maluk jornalista Indonézio ida mate iha lautem.”
“1975 mate sira na’in lima (5) iha Balibo, ida iha Ponte Kais, 1999 Sander Robert Thoenes iha bekora. Ne’ebé deliberasaun ne’e hanesan ónra id aba sira,” Pezidente CI, Virgílio deklara iha plenária aberta ba serimónia atribuisaun karteira professional.
Iha biban ne’e, Jornalista famozu iha Timor, Max Sthal hatete kna’ar jornalista ne’e hanesan previléjiu ida ho responsavel boot tanba Jornalista bele hasoru ema boot (Ukun na’in) sira, hakerek sira nia ideia hodi transmit ba públiku.
Max Sthal dehan jornalista maka defende ema sira lian laek sira hosi partisipa mós iha debate asuntu nasaun nian, hodi husu ba ukun na’in sira hodi tau matan ba ema sira lian laek.
“Jornalista tenke hamutuk hodi fó realidade ba demokrásia, ne’e ami nia responsabilidade. Demokrásia iha liafuan de’it, ida ne’e traisaun ba povu. Demokrásia ne’ebé boot tenke liuhosi jornalista sira,” dehan Max Sthal.
(*)