Conselho de Imprensa hato’o agradesementu ba Pertamina Internasionál, RTTL,EP, Kompañia Heineken, Timor Telekom, Grupu Rebenta, ne’ebé fó apoiu ba serimónia Atribuisaun Karteira Profesionál

Conselho de Imprensa hato’o agradesementu ba Pertamina Internasionál, RTTL,EP, Kompañia Heineken, Timor Telekom, Grupu Rebenta, ne’ebé fó apoiu ba serimónia Atribuisaun Karteira Profesionál

Atividade Hare nain: 2915

Díli, 21 Dezembru 2017 – Conselho de Imprensa de Timor-Leste (CI), realiza tiha ona serimónia Atribuisaun Karteira Profesionál ba Jornalista hamutuk 216, iha loron 20 Dezembru 2017, hodi fó rekoñesimentu ba jornalista Timoroan sira kona-ba títlu professional iha atividade jornalístika nian.

Ba realizasaun serimónia atribuisaun karteira professional, konta mós apoiu hosi patrosinu sira hanesan Ajensia UNDP liuhosi kooperasaun povu Japaun ne’ebé apoiu ekipamentus ba imprimi kartaun ba jornalista sira, Rádiu Televizaun Timor-Leste, Empreza Públika (RTTL,EP) ne’ebé fó espasu la ho kustu hodi realiza programa entrevista eskluzivu kona-ba atribuisaun karteira professional, Kompañia Heineken ne’ebé apoiu mós bebidas, Pertamina Internasionál ne’ebé oferese fatin ba serimónia, Timor Telekom ne’ebé fasilita ona pulsa komunikasaun ba ekipa komisaun organizadora, grupu Rebenta ne’ebé anima ona audiénsia sira.

Iha diskursu abertura, Konsilleiru José Maria Ximenes hato’o agradese wa’in ba patrosinu tomak ne’ebé tulun ona Conselho de Imprensa ba realizasaun serimónia atribuisaun karteira professional.

“Conselho Imprensa hakarak hato’o agradese ba parseiru sira ne’ebé ho sira nia kontribuisaun bele hala’o eventu ida ne’e,” Konsilleiru José Maria Ximenes hato’o iha perante abertura serimónia atribuisaun karteira professional, Kuarta-Feira, 20/12/2017, iha Delta Nova.

Tuir Lei komunikasaun Sosiál, Artigu 44, fó kompeténsia ba Conselho de Imprensa maka atu atribui karteira professional ba jornalista sira. Artigu hosi lei ne’e mós fortifika hosi regulamentu CI nian nú 6/2017, Artigu 3 kona-ba títlu professional jornalista nian.

Alien de atribui kartaun karteira professional ba jornalista hamutuk na’in 216, Conselho de Imprensa mós atribui sertifikadu de ónra no rekoñesimentu postumu ba jornalista onoráriu internasional no nasional ne’ebé fó ona sira nia vida iha mundu jornalízmu nian.

Partisipa iha eventu ne’e, Laureadu Nobel da Pas, Antigu Jornalista, Dr. Jose Ramos Horta, Sefi Kaza Sivil, Prezidensia Repúblika, Dr. Francisco Maria de Vas Conselhos, Adjunda Prokuradora Jerál da Repúblika, Dra. Zelia Trindade, Sekretáriu Estadu Konsellu de Ministru no Komunikasaun Sosiál, Dr. Matias Freitas Boavida, Jornalista naran boot, Sr. Max Sthal, Prezidente Autoridade Nasionál Komunikasoens, Eng. António Brígido Correia, Prezidente CI, Sr. Virgílio da Silva Guterres no Membru sira, konvidadus no parseiru CI nian, patrosinadu sira, família joralista sira ne’ebé mate ona no maluk jornalista sira hotu. (*)