Imprimir
Kategoria: Atividade
Hare na'in: 548

Dili, 4/12 – Prezidente Conselho de Imprensa de Timor-Leste (CI), Virgílio  da Silva Guterres, ho Membru CI no Ezekutiva CI, hala’o enkontru ho Primeiru - Ministru, Mari Alkatiri, iha salaun enkontru Palasiu do Governu, Segunda - feira ne’e.

Iha enkontru ne’e, Prezidente CI, informa ba Xefe Governu kona-ba servisu no atividade CI nian hanesan atribuisaun Karteira Profisionál jornalista, situasaun no kondisaun mídia sira, insitusionaliza fatin formasaun ba mídia, kondisaun atuál edifísiu CI no kooperasaun serbisu iha rejiaun.

Iha enkontru ne’e, Membru CI, Konselleiru, Hugo Maria Fernandez, hato’o mós kona-ba regulamentu sira ne’ebé CI Produz no mediasaun sira ba keisa ne’ebe tama iha CI.

Primeiru - Ministru RDTL, Mari Alkatiri, hatete atu jornalista hala’o kna’ar livre maibé ho responsabilidade, presiza tebes órgaun hanesan Conselho de Imprensa ba tau matan no husu CI atu kontinua hala’o serbisu ho di’ak.

“Iha VII Governu, iha komitmentu boot tebes hateke mídia iha nia polítika sira,” dehan Primeiru - Ministru, Mari Alkatiri.

Alein ne’e, Xefe Governu haktuir nia hare katak iha politizasaun mídia ka iha mídia balun ne’ebé ninia obra tendénsia politizadu nune’e husu CI atu hare mos ba ida ne’e.

Prezidente Conselho de Imprensa de Timor-Leste (CI), Virgílio  da Silva Guterres ,enkoraja mós ba nai ulun sira atu iha komunikasaun iha situasaun polítika atuál, atu la’ós hatán de’it rival nia argumentu maibé hatán mós públiku nia hakarak.