Díli, 27/10 – Mandatu Conselho de Imprensa de Timor-Leste (CI) foin tinan ida ho balun, CI uza duni nia kompeténsia mediasaun hodi hakotu problema entre Rádiu Televizaun Timor-Leste, Empreza Públika (RTTL,EP) ho kompañia Burger King (BK).
Hafoin ramata mediasaun, Conselho de Imprensa estabelese kedan akordu mediasaun nian ne’ebé sita katak parte RTTL,EP simu direitu hatán no retifikasaun hosi kompañia Burger King atu públika hikas iha sítiu elektróniku RTTL,EP nian iha pájina ne’ebé hanesan ho notísia ne’ebé antes RTTL,EP públika ona.
Antes ne’e, RTTL,EP halo publikasaun notísia ida ne’ebé parte Kompañia Burger King konsidera notísia ne’e estraga sira nia naran di’ak no la iha klarifikasaun hosi kompañia Burger King tanba ne’e kompañia BK lori kazu ne’e ba CI atu buka solusaun hamutuk.
Iha notísia ne’ebé públika iha sítiu elektróniku ofisiál RTTL,EP iha loron 11 Agostu 2017, ho tópiku CSTL Registou Casos Em Timor-Leste (Sigla Portugés) ne’ebé sita katak traballadores kompañia Burger King halo greve hasoru kompañia BK tanba la selu osan estra funsionáriu kompañia BK nian.
Ho razaun laiha konfirmasaun no estraga naran di’ak kompañia Burger King maka kompañia internasionál ne’e hato’o keisa ba CI, iha loron 7 Setembru 2017, hodi husu CI atu fasilita diálogu entre BK ho RTTL,EP atu hetan solusaun ida di’ak.
Bazeia ba keisa ne’ebé hato’o hosi kompañia BK, iha loron 13 Outubru 2017, CI bolu estrutura RTTL,EP hodi hahú halo mediasaun nune’e bele verifika loloos kazu refere.
Iha biban ne’e Prezidente Interinu CI, Konsilleiru, José Ximenes, hatete CI iha papél atu halo mediasaun de’it maibé konkordánsia mai hosi parte rua (RTTL ho Burger King) maka deside atu hakotu problema ne’e iha CI de’it ka lori ba dalan legál nian.
“Ohin RTTL mai to’o iha ne’e tanba iha keisa hosi kompañia Burger King ne’ebé hare liu ba online, tanba ne’e maka ami bolu mai iha ne’e hodi hanoin katak ezijénsias ne’e bele hotu iha ne’e entre parte rua ne’e.”
“Maibé kuandu la hotu, ami hanesan halo mediasaun no la inklina ba se se de’it,” Prezidente Interinu CI, Konsilleiru José Ximenes hato’o kestaun ne’e iha enkontru dahuluk ho reprezentante RTTL,EP, iha salaun plenária CI, Sesta-Feira (13/10/2017).
Iha biban ne’e, Prezidente Konsellu Administrasaun RTTL,EP, Milena Abrantes hatete tuir parte RTTL,EP nian katak notísia ne’e balansu no jornalista sira koko duni atu halo entrevista ho parte kompañia Burger King maibé kompañia BK maka laiha espasu atu hasoru jornalista sira.
“Iha parte ami nian hatene katak notísia ne’ebé ami fó sai iha balansu, signifika hosi parte jornalista sira ne’ebé halo kobertura ba demostrasaun ne’ebé maka iha, tenta atu hasoru parte kompañia Burger King maibé labele. Ami fó nafatin espasu para kompañia Burger King hato’o direitu de respota,” dehan Milena Abrantes.
Entretantu iha loron hanesan, CI mós konvida parte Burger King hodi konfirma mós informasaun balun hosi keisa ne’e rasik, inklui saída maka kompañia BK nia intensaun ba oin kona-ba kazu referee.
Iha fatin hanesan, Chief Operating Officer East Timor Trading Group, Samitha Aluwihare, hatete objetivu hosi kompañia Burger King nian maka hakarak husu klarifikasaun hosi publikasaun RTTL,EP nian inklui husu oportunidade atu kompañia BK halo klasifikasaun ba situasaun real ne’ebé akontese iha kompañia Burger King bainhira traballadór sira hala’o greve hasoru kompañia BK.
“Iha informasaun balun ne’ebé fó sai iha notísia RTTL.EP ne’e laloos, tanba ne’e ami hakarak fó oportunidade ida atu fó hatene ami nia pontu de vista kona-ba situasaun ne’ebé temi iha reportajen,” Samitha esklarese.
Tuir kompañia BK katak informasaun ne’ebé fó sai hosi RTTL,EP ne’e laloos no la kompletu tanba ne’e kompañia BK ezerse sira nia direitu tuir lei haruka atu labele husik impresaun iha komunidade katak iha komportamentu ne’ebé la di’ak hosi kompañia BK.
Tanba ne’e, kompañia Burger King nia preokupasaun prinsipál maka hakarak hato’o lia loos ba públiku katak kompañia BK nia naran iha Timor-Leste moos no labele hafoer kompañia BK nia naran.
“Burger King internasionál fó ba East Timor Traiding, kompañia ne’ebé estabelese iha Timor atu kaer sira nia naran nomós atu instala restaurante ne’e iha fatin hotu-hotu iha Timor-Leste. Karik sira hafoer naran Burger King nian, sira bele hetan konsekuénsia ne’ebé maka’as hosi Burger King Internasionál,” dehan Samitha.
Hafoin rona tiha esplikasaun kona-ba kazu ne’e, Conselho de Imprensa, RTTL,EP no kompañia Burger King hamosu konkordánsia ida atu hakat ba prosesu mediasaun ne’ebé lidera diretamente hosi CI tuir mandatu ne’ebé garante iha lei KomSos.
Iha prosesu mediasaun, Diretór Diresaun Apoiu Jurídiku no Liberdade Imprensa (DAJLI), Olderiku da Kosta, hetan fiar hosi CI atu lidera prosesu mediasaun entre RTTL,EP ho parte kompañia Burger King.
Iha prosesu mediasaun, Diretór DAJLI hatete CI kontente tebes tanba parte rua hosi RTTL,EP no Burger King fó fiar ba CI atu lidera prosesu mediasaun hodi bele buka solusaun ba problema ne’ebé parte rua hasoru.
DAJLI esplika mediasaun la’ós hanesan ho prosesu iha tribunál ne’ebé buat hotu bazeai ba faktus no dadus, maibé iha prosesu mediasaun koko atu buka resolve problema ba parte rua hotu bele hetan solusaun ida di’ak ba RTTL,EP no kompañia Burger King.
Hafoin ramata mediasaun, Prezidente Konsellu Administrasaun RTTL,EP, Milena Abrantes hato’o agradese wai’in ba CI tanba bele bolu hamutuk parte rua hodi hatan ba malu preokupasaun sira ne’ebé liga ho publikasaun RTTL,EP nian.
“Ami nia parte Rádiu no Televizaun mós hato’o agradese ba CI bele lori hamutuk ami mai iha fatin ida ne’e, nune’e bele hatan ba dezafiu sira hotu ne’ebé liga ba ami nia informasoens ne’ebé fó,” Milena Abrantes esplika.
Entretantu, Samitha Aluwihare, mós hato’o agradese wa’in ba CI no RTTL,EP bele solusiona problema ne’e. “Hein katak iha futuru ita bele ko’alia direita ba malu de’it atu bele rezolve problema ruma ho di’ak liután”.
Parte rua hamosu ona konkordánsia katak Burger King haruka hikas karta resposta ida atu RTTL,EP públika hikas iha pájina elektróniku RTTL,EP nian nu’udar direitu hatán no ratifikasaun tuir regulamentu CI nian.
Mandatu tinan ida ho balun, Conselho de Imprensa de Timor-Leste konsege ona halo mediasaun kona-ba kazu rua relasiona ho publikasaun notísia ne’ebé hetan duni solusaun maka hanesan kazu primeiru, Online Helo Timor Copy notísia hosi online Ola Timor, Kazu segundu, RTTL,EP halo publikasaun kona-ba Kompanñia Burger King sein konfirmasaun. (CI)