Balibó, 21/10 - Conselho de Imprensa de Timor-Leste(CI), partisipa iha atividade solidariedade ba Jornalista Australianu nain lima ne’ebé mate iha Postu Administrativu Balibó, Munisípiu Bobonaro, tanba Militár Indonesia oho, iha loron 16 Outubru tinan 1975 no mós reflesaun hodi hanoin hikas kontribuisaun Jornalista nian luta ba independénsia Timor-Leste hahú husi tinan 1975 to’o tinan 1999. Atividade ne’e organiza no realiza husi Asosiasaun Jornalista Timor-Leste(AJTL) iha Balibó, iha loron 21 ate 22/10/2017.
Alein ne’e, vizita museum Balibó, Fatin Jornalista Australianu nain lima hala’o no halo mós asaun Solidariedade hodi fo ajuda fos, mina no nesesidade basiku seluk ba idosa ida ne’ebé durante ne’e hela mesak, iha Aldeia Fatuk-Laran, Suku Balibó.
Hafoin ne’e kontinua sunu ahi no halo reflesaun, Prezidente AJTL, David Hugo hatete, refleksaun ne’e atu relembra jornalista Australianu nain 5 ne’ebé mate iha Balibo (16 fulan Outubru 1975) inklui jornalista Australianu ida ne’ebé mate iha Dili, loron invasaun 7 Desembru tinan 1975. “ lori Jornalista sira mai atu halo reflesaun ida hodi hanoin kontribuisaun Jornalista nain lima inklui sira nia kolega Jornalista nain ida ne’ebé mak mai buka tuir sira nain lima ne’ebé nia mós mate iha loron 7 fulan Desembru tinan 1975 iha Dili, sira mate ba rai ida ne’e e, to’o ikus ema hatene Timor eziste duni, iha duni no Timor hakarak ukun an,” nia esplika.
Prezidente AJTL hatutan katak, jornalista internasional hirak ne’e nia sakrefisu nu’udar exemplu kona-ba oinsa jornalista sira nia serbisu atu hato’o informasaun ba publiku. “saida mak sira fó, nu’udar ezemplu di’ak ba ita Jornalista sira, oinsá atu habelar informasaun ba públiku,” haktuir David Hugo.
Iha oportunidade hanesan, Sekretáriu Estadu Konsellu Ministru no Komunikasaun Sosiál, Matias Freitas Boavida, haktuir katak akontesementu Balibo iha tinan 1975 nu’udar akontesementu ne’ebé relasiona oinsa timor oan sira ne’eb’e hela iha área fronteira tenki lakon sira nia direitu nu’udar umanu.
“situasaun sira hanesan memória ida, AJTL iha laran Kaman, komemora, signifika katak assume realidade entre Jornalista la’ós entre ita iha rai laran de’it maibé ita mós iha solidariedade ba maluk sira rai li’ur tanba misaun ne’ebé ita halo, misaun Jornalista nian importante ba país ida mak halo sira nia knar iha roda demokrasia.”
Relasiona ho komemorasaun ne’e, Diretora Ezekutiva Conselho de Imprensa de Timor Leste, Ana Teresa Sequeira, hatete apresia tebes ho atividade ne’e, "CI apresia ba AJTL ne'ebé organiza hodi lori jornalista sira ba fatin akontesimentu iha Balibó.
Ita hatene katak akontesimentu ne'e ninia influensia politikamente boot tebetebes ba ita nia libertasaun. Sakrifísiu no servisu jornalista nain 5 ne'e nian iha momentu ne’ebá e to’o agora sai nu’udar lisaun ida ba ita hotu atu tau hamutuk konsiensiensia no esforsu atu serbisu ba liberdade imprensa no liberdade espresaun. Maski libertasaun territóriu ita hetan ona, maibé liberdade espresaun no liberdade imprensa presiza asegura nafatin ho responsabilidade ida ne’ebé mai hosi ita hotu, tantu jornalista no mós públiku." esplika Ana Teresa Sequeira.
Hafoin rematta diskursu, partisipantes kontinua rona istória husi Sasin ba akontesimentu Balibó, aprezentasaun Filme Balibó Five nomós divertimentu.
Jornalista feto no mane husi mídia online, printing, radio no televizaun kuaze ema 50 resin mak partisipa iha eventu ne’e, inklui autoridade lokal. Atividade ne’e hetan suporta husi kompañia mídia sira no Conselho Imprensa rasik Oferese banner, ai-han no karreta ba eventu ne’e.