Adjuntu Administradór Munisípiu Liquiça, Renato Nunes Serrāo, iha nia intervensaun loke Sosializasaun Lei Komunikasaun Sosiál no Regulamentu sira CI nian, iha salaun STAE, Munisípiu Liquiça, Kinta - Feira 5/10/2017, hatete presiza lei atu haforsa jornalista nia knaar, “atu haforsa sira nia papél, presiza lei atu fó kbi’it ba Jornalista hodi fó informasaun ba populasaun, nune’e husu ita boot sira nia atensaun ba Sosializasaun ne’e atu bele intende ho di’ak lei komunikasaun sosiál no regulamentu sira CI nian atu bele apar,” husu Adjuntu Administradór Munisípiu Liquiça.
Adjuntu Administradór Munisípiu Liquiça haforsa katak jornalista mak públiku bele asesu ba sai informasaun, “ho Jornalista mak bele divulga informasaun, sein Jornalista, ita sei la asesu informasaun”.
Iha biban ne’e , Prezidente Interinu Conselho de Imprensa de Timor-Leste(CI), Jose Maria Ximenes introdús ba partisipantes sira sobre natureza no Regulamentu sira CI nian inklui serbisu ezekutiva CI nian.
Nune’e mós, Konsilleiru CI, Paulo Araujo iha nia intervensaun mensiona kle’an kona-ba oinsá konstituisaun fó dalan ba hamosu Lei Komunikasaun Sosiál, “ko’alia kona-ba lei komunikasaun sosiál ita presiza hatene lei komunikasaun sosiál oinsá bele iha, iha konstituisaun RDTL, artigu 40, 41 fó dalan ba hamosu Lei Komunikasaun Sosiál,” dehan Konsilleiru Paulo.
Konsilleiru Paulo esplika kle’an mós sobre regulamentu sira CI nian ho nia sentidu sira, regulamentu hirak ne’e hanesan regulamentu númeru: 1/2017-Kódigu Étika Jornalístika, Regulamentu númeru: 2/2017, Rejistu Órgaun Komunikasaun Sosiál, Regulamentu númeru: 3/2017-Prosedimentu Midiasaun hosi Conselho de Imprensa, Regulamentu númeru: 4/2017-Prosedimentu ba Ezersísiu Direitu Hatán no Retifikasaun, Regulamentu númeru: 5/2017-Prosedimentu Dixiplina Hasoru Jornalista no
Publikasaun Sira, Regulamentu númeru: 6/2017-Karteira Profesionál Jornalista nian no Regulamentu númeru: 7/2017-Regra sira ne’ebé bele aplika ba Ezame Finál Estájiu nian no Entidade Ezaminadór sira Iha Repúblika Demokrátika de Timor-Leste.
Adjuntu Komandante Polísia Liquiça, Eduardo Campos, ko’alia liu kona-ba papél mídia, “Papél mídia boot no importante atu rekoñese mós papél mídia iha tempu rezisténsia katak ho mídia nia kontribuisaun Timor atinje nia ukun rasik-án”.
Diretór Apoiu Jurídiku no Liberdade Imprensa, Olderiku A. da Kosta no Tékniku Apoiu Jurídiku, Fransisco da S.B. Cunha halo aprezentasaun ba Lei Komunikasaun Sosi’al, númeru: 5/2015, loron 19 fulan Novembru no Regulamentu númeru: 4/2017-Prosedimentu ba Ezersísiu Direitu Hatán no Retifikasaun.
Iha sesaun diskusaun, partisipantes sira foti kestaun ba direitu ba fó no hetan informasaun katak populasaun hakarak fó informasaun ba jornalista sira maibé dala barak mak Jornalista halo kobertura la to’o área remotas, kestiona mós balansu konteúdu óbra iha publikasaun hosi jornalista sira hanesan la hetan fontes liu ida iha sira nia obra, língua tetun no portugés ne’ebé baibain mosu iha óbra jornalista nian hodi hatudu katak, jornalista seidauk hakerek ho lian Tetun ne’ebé di’ak no loos.
Conselho de Imprensa responde kestaun hirak ne’e ho esplikasaun sobre kondisaun atuál órgaun komunikasaun sosiál sira, Conselho de Imprensa mós esplika sobre CI sei fó karteira profisionál ba Jornalista sira hodi hatudu katak, sira profisionál entermus de kualidade iha hala’o sira nia knaar.
Partisipantes iha Sosializasaun ne’e ho totál 30, feto 4 no mane 26 kompostu hosi Adjuntu Administradór Munisípiu Liquiça, Adjuntu Komandante Polísia Liquiça, Administradór Postu Administrativu sira, Xefe Suku sira, Organizasaun Naun Governmentál sira no Jornalista sira Rádiu Komunidade Liquiça nian. (CI)