Díli, 5/10 – “Liberdade la signifika lisensa ida ne’ebé livre hosi responsabilidade,” Lia fuan ne’e hato’o hosi Konsilleiru Conselho de Imprensa de Timor-Leste (CI), Paulo A. C. Araujo, iha aprezentasaun Rezultadu Monitorizasaun no Análize Mídia, durante Períodu Eleisaun 2017, iha salaun Fundasaun Oriente, iha loron 26/9/2017.
Aprezentasaun rezultadu monitorizasaun no análize mídia ne’e, nu’udar referénsia ba kanál mídia sira atu hadi’a produtu jornalístiku iha Timor-Leste.
Konsilleiru Paulo sita katak, “ita rona beibeik ona kona-ba prinsípiu jornalista ninian, no ko’alia kona-ba sosiedade demokrátiku ne’ebé ezije, katak direitu espresaun no direitu atu hetan informasaun tenke eziste iha ita nia sosiedade, direitu ne’e bele asegura kuandu imprensa sira iha liberdade atu públika faktu”.
Iha fatin hanesan Diretór Diresaun Dezenvolvimentu no Análize Mídia (DDAM), Alberico da Costa Junior, informa sobre maneira Conselho de Imprensa iha halo monitorizasaun ba obra mídia, “iha prosesu monitorizasaun, ekipa DDAM-CI uza formatu ida, ne’ebé ninia konteúdu ne’e maka inklui asuntu importante tolu (3) hanesan, prinsípiu jornalístiku, aspetu legál no valór notísia.”
Diretór DDAM hatete durante eleisaun parlamentár kanál mídia sira fó espasu ba partidu hotu hodi hato’o sira nia programa no plataforma polítika, “Jeralmente kobertura ba eleisaun parlamentár, kanál mídia sira fó espasu ba partidu polítiku hotu-hotu hodi hato’o sira ninia programa no plataforma polítika. Maske nune’e iha espasu públisidade nian, partidu boot sira ne’ebé ho kapasidade finanseiru boot mak domina iha espasu refere, enkuantu, partidu ki’ik sira ne’ebé laiha kapasidade finanseiru la hetan espasu hanesan”.
Iha aprezentasaun ne’e DDAM sita, obra hosi mídia sira hanesan Jornál Matadalan, edisaun 3 – 9 Maiu 2017, Jornál Suara Timor Lorosa’e, edisaun Tersa (30/5/ 2017), Jornál Timor Roman, edisaun Kuarta (21/6/ 2017), Jornál Timor Roman, edisaun Tersa (1/7/ 2017), Televizaun Timor-Leste, edisaun Sábadu (24/6/ 2017), RTTL: Kobertura ba Apuramentu Nasionál, GMN TV: Iklan Politik Terselubung iha Periódu Kampaña Polítika, Jornál Timor Post, edisaun Sábadu (24/6/ 2017), Jornál Timor Post, edisaun Tersa (5/7/2017), Jornál Independente, edisaun Kuarta (28/6/ 2017), Jornál Independente, edisaun Kinta (27/7/ 2017), Diário Nacional, Tersa (18/7/ 2017), Diário Nacional, edisaun Segunda (24/7/ 2017), Online Tatoli, edisaun Tersa (18/7/2017) no Jornál Tempo Semanál, edisaun Segunda (17/6/2017).
Hafoin de Diretór DDAM, aprezenta rezultadu monitorizasaun, partisipantes sira haktuir katak sira kontente ho rezultadu monitorizasaun ne’e no sei kontinua halo di’ak liu ida ne’ebé mak di’ak ona no sei hadi’a mós ida ne’ebé mak sei sai hanesan frakeza.
“ha’u kontente ho monitorizasaun hosi Conselho de Imprensa ninian, ida ne’e sai hanesan sujestaun atu hadi’a iha futuru,” dehan Gaudencio Marques Figueredo hosi Jornál Independente.
Lita Isabelita hosi Jornál The Dili Weekly mós haktuir katak, “ami apresia ho rezultadu monitorizasaun hosi CI”. (CI)