Díli – Konsilleiru, Conselho de Imprensa de Timor-Leste (CI), Francisco Simões Belo hatete jornalista sira iha liberdade maibé ho responsabilidade hodi asegura funsaun jornalista nian hanesan kontrolu sosiál, edukativu no informativu.
Konsilleiru Francisco hato’o kestaun ne’e, bainhira sai nu’udar oradór iha treinamentu ho tema “Haforsa Polítiku Jornalízmu ba Jornalista Rádiu Komunidade”, iha salaun enkontru Ótel JL Vila, Fatuhada, Díli, Segunda-Feira (02/10/2017), ne’ebé organiza hosi Timor-Leste Media Development Center (TLMDC).
“Konstituisaun RDTL garante liberdade Imprensa no liberdade espresaun fó kbiit tebes ba jornalista sira hala’o knaar ho livre, maibé iha mós regulamentu ho lei sira ne’ebé fo dalan ba jornalista sira atu hala’o knaar, mezmu iha liberdade maibé ho responsabilidade,” dehan Konsilleiru Francisco.
Iha biban ne’e, Konsilleiru Francisco, lori Conselho de Imprensa nia naran hodi aprezenta materia kona-ba “Direitu no Responsabilidade Jornalista nian iha Timor-Leste”.
Konsilleiru kongratula katak, TL foin ukun-án tinan 15 maibé iha ona jornalista lubuk ida ne’ebé bele halo serbisu ho di’ak tebes ba apoiu prosesu tomak iha rai laran.
Hatan kona-ba jornalista iha kbiit ka lae kona-ba análize no fahe informasaun, Konsilleiru CI ne’e konsidera apoiu oituan ka barak hosi jornalista sira kontribui ona ba dezenvolvimentu TL.
Konsilleiru husu ba jornalista sira atu obidese ba kódigu étika Jornalístika ne’ebé hanesan matadalan ida atu jornalista hotu-hotu halo serbisu tuir giaun refere.
Entretantu, Diretór Sentru Estudu ba Pas no Dezenvolvimentu (CEPAD), João Boavida haktuir bainhira hili knaar nu’udar jornalista tenke hakruk ba lia loos, atu lori buat ne’ebé hosi nakukun ba naroman.
Nia haktuir, iha asuntu rua maka sente todan boot ba jornalista sira bainhira hala’o knaar hanesan ema jornalista maka hanesan TL seidauk iha Lei Antí-Korupsaun no Lei Liberdade Asesu ba Informasaun.
Nia dezafia katak, asuntu rua refere sei sata netik dalan jornalista sira atu halo serbisu ida di’ak liu nu’udar kontrolu sosiál ida iha TL. Maske nune’e, João Boavida husu atu jornalista sira la’o tuir nafatin kódigu Étika Jornalístika.
Partisipa iha treinamentu ne’e, reprezntante jornalísta hosi rádiu komunidade sira hosi munisípiu 12, inklui Reziaun Autónoma Espesiál Oe-cusse-Ambeno. (CI)