Bobonaro, 4/10 - Prezidente Autoridade Munisípiu Bobonaro, Zeferino Soares do Santos, agradese ba Conselho de Imprensa de Timor-Leste (CI) nia prezensa iha Munisípiu Bobonaro hodi hala’o Sosializasaun ba Lei Komunikasaun Sosiál no Regulamentu sira CI nian, iha salaun PDHJ, Soku Holsa, Postu Administrativu Maliana, Munisípiu Bobonaro, Quarta – Feira, 04/10/2017.
Zeferino Soares do Santos Hatete, sosializasaun ne’e importante atu partisipantes sira bele hatene oinsa atu fó no hato’o informasaun ne’ebé los tuir lei “lei hanesan matadalan, dada ita ba dalan ida ne’ebé loos, nune’e ita sira iha ne’e, sei hare lei nia orientasaun oinsá, ha’u fiar katak Sosializasaun ne’e ajuda ita, fó no hato’o notísia ne’ebé loos, partisipa ho di’ak, akompaña ho di’ak, atu nune’e ita hotu la sees hosi lei hodi fó no hato’o informasaun”.
Prezidente CI interinu Konsilleiru, José Maria Ximenes, iha nia intervensaun agradese ba partisipantes sira nia partisipasaun. Alein ne’e, Prezidente CI interinu esplika natureza Conselho de Imprensa de Timor-Leste (CI) nómos objetivu hosi sosializasaun ne’e.
“Hanesan kakesi ida ba Jornalista, atu Jornalista halo knaar tuir lei ne’ebé iha, nune’e Conselho Imprensa halo Sosializasaun ba autoridade sira,” informa Prezidente CI internu.
Hafoin sesaun Abertura, Diretór Apoiu Juridiku no Liberdade Imprensa, Olderiku Araújo da Kosta, aprezenta no esplika kle’an sobre konteúdu Lei Komunikasaun Sosiál ho nia sentidu sira hodi aprezenta no esplika mós regulamentu sira CI nian, liuliu regulamentu nú: 4/2017-Prosedimentu ba ezersísiu direitu hatán no ratifikasaun.
Iha sesaun diskusaun partisipantes sira kestiona independénsia mídia no profesionalizmu jornalista nian iha hakerek no públika informasaun, husu mós oinsá CI garantia profesionalizmu mídia no jornalista nian iha hakerek no públika informasaun. Partisipantes seluk ko’alia kona-ba sosiál mídia Facebook ne’ebé konsidera hanesan hamosu diskriminasaun barak nune’e husu CI atu halo limitasaun.
Partisipantes sira mós, hato’o Sujestaun ba CI atu fó formasaun ba Jornalista sira. “formasaun mais importante ba jornalista iha hakbiit profesionalismu,” dehan Paulino Viegas Tilman, Board Rádiu Komunidade Maliana.
Xefe Suku Holsa, Postu Administrativu Maliana, Antonia Santa Cruz, kestiona kona-ba área kobertura mídia nian ne’ebé sentraliza iha kapitál no konsidera jornalista sira hanesan “Jornalista Musiman,” tanba halo kobertura to’o área rurál bainhira iha atividade sira ka eventu sira ne’ebé boot no partisipa hosi na’i ulun sira .
Resposta konaba independénsia mídia no profesionalidade jornalista nian iha hakerek no públika informasaun, Diretora Ezekutiva CI, Ana Teresa Sequeira, esplika sobre servisu Ezekutiva CI nian hodi hala’o monitorizasaun ba obra mídia no públika periodikamente rezultadu monitorizasaun ne’e ba mídia no públiku. Monitoriamentu no análiza ba produtu jornalistíku ne’e nu’udar servisu prinsipál ida husi Diresaun Desenvolvimentu no Análiza Mídia (DDAM) Conselho de Imprensa nian atu identifika kualidade notisia sira ne’ebé públika atu bele lao tuir nafatin Kódigu Étika Jornalistíka no Lei Komunikasaun Sosiál. Alem de ne’e nu’udar sasukat ida atu halo kapasitasaun jornalista sira iha Timor-Leste nune’e bele ajuda hases jornalista sira husi lasu no risku legál sira iha futuru.
Iha oportunidade ne’e, Prezidente CI internu, José Maria Ximenes, agradese ba sujestaun sira ne’ebé partisipantes fó no sei tau iha konsiderasaun, fahe mós esperiénsia sira relasiona ho área kobertura mídia nian hodi hasa’e koñesimentu partisipantes sira ba kondisaun no situasaun órgaun no meiu komunikasaun sira iha Timor-Leste.
Partisipantes iha Sosializasaun ne’e ho total 30, Mane 25 no Feto 5, kompostu husi Prezidente Autoridade Munisípiu Bobonaro, Administradór Postu Administrativu sira, Xefe Suku sira, Komandante Polísia Eskuadra Bobonaro, ONG Lokál, Profesór, Board e no Jornalista Rádiu Komunidade Maliana. (CI)