Munisípiu Ermera husu CI fó formasaun maneira entrevista iha mídia

Munisípiu Ermera husu CI fó formasaun maneira entrevista iha mídia

Atividade Hare nain: 7340

Sekretáriu Administrasaun Munisípiu Ermera, Danilio Osorio Babo husu ba CI atu kria programa importante iha área formasaun nian, liuliu fó formasaun ba lider Munisípiu sira oinsá maneira entrevista iha mídia. Danilio Osorio Babo hato’o rekomendasaun ne’e wainhira halo abertura ba Sosializasaun lei Komunikasaun Sosiál no Regulamentu Conselho de Imprensa  nian, iha salaun Administrasaun Munisípiu Ermera, Quarta – Feira, 27/09/2017.

Razaun husu CI fó formasaun ba lider Munisípiu sira atu nune’e lider sira fó sai informasaun ba públiku liu husi mídia ho kualidade no labele defama fali ema seluk. 

“Ami iha munisípiu presiza liuliu formasaun kona-ba maneira entrevista ho mídia sira hodi nune’e publikasaun ne’ebé fó sai ba públiku ho kualidade, “presta Danilio.

Iha oportunidade ne’e mós Sekretáriu Administrasaun Munisípiu Ermera ne’e enkoraja jornalista Ermera oan sira ba oin presiza kria bulletin munisipál atu nune’e dudu prosesu dezenvolvimentu iha munisípiu di’ak liután. Bulletin ne’e atu kobre asuntu ne’ebé ajente estadu iha Munisípiu sira hala’o. 

Danilio mós husu ba mídia sira bainhira atu publika notísia ne’ebé di’ak presiza halo check in recheck. Husu mós ba mídia lokal sira mós tenke hatene lei komunikasaun sosiál no regulamentu sira Conselho de Imprensa nian, atu nune’e mídia hotu servisu la’o iha corridor ida de’it.

“Hau hein ho Sosializasaun lei komunikasaun sosiál no regulamentu sira atu jornalista iha munisípiu no públiku bele intende ho di’ak, ”dehan Danilio Osorio Babo. 

Antes ne’e, Konselleiru CI, Francisco Simões Belo iha ninia diskursu hatete, CI hari tuir lei númeru 5/2014, ninia natureza independente ho ninia membru nain 5.  CI iha ninia Kompeténsia ne’ebé lei fó dalan importante mak promove no asegura Liberdade imprensa no Liberdade espresaun, ne’ebé garante iha Konstituisaun RDTL iha artigu 40 no 41.

Ko’alia kona-ba-ba étika jornalizmu no profesionálismu. CI ninia ejistensia hodi kontrolu informasaun ne’ebe atu publika iha mídia tenke loloos ho faktus. CI ninia Kompeténsia seluk mak aprova  no superviziona meus komunikasaun sosiál no jornalista sira atu kumpri code étika, kapasita jornalista sira inklui mós advokasia ba jornalista no públiku bainhira mosu problema ho informasaun ne’ebé publika. 

Iha fulan Novembru tinan ne’e, CI liu husi ninia Kompeténsia sei atribui karteira professional ba jornalista sira ne’ebé hala’o sira nia knaar tinan lima ba leten. Objetivu karteira professional atu fasilita diak liután jornalista sira hodi hala’o sira nia knaar iha públiku ho responsabilidade.

“See jornalista ida bainhira deside ba iha vida polítiku CI sei dada fila ninia karteira professional nu’udar jornalista, tanba prinsípiu iha mídia jornalista labele halo pratika polítika, “dehan Konselleiru CI, Francisco Simões Belo.

Prezidente Assosiasaun Feto Munisípiu Ermera, Maria Exposto hatete, ho sosiálizasaun lei Komunikasaun Sosiál no regulamentu sira ne’e importante tebes ba públiku espesial ba feto tanba feto barak la asesu ba informasaun.

Maria Exposto hanesan mos Prezidente Board ONG Caucus Feto iha Politika, husu ba CI atu enkoraza mídia sira foti asuntu jenéru hodi sai balansu iha publikasaun sira iha prosesu dezenvolvimentu nasionál.

Iha fatin hanesan, korrespondente RTTL-EP Michaela do Santos  hatete, ho sosiálizasaun lei Komunikasaun sosiál no regulamentu sira husi CI ne’e importante, laos deit ba jornalista sira maibe importante mos ba komunidade ou publiku sira bele hatene knaar no dever jornalista nian nomos publiku, liliu kona-ba informasaun sira ne’ebe fo sai ba publiku. 

Kona-ba karteira professional ba jornalista, Korespondente ne’e apresia tebes ho esforsu CI ninia hodi valoriza jornalista sira servisu hanesan kareira professional ida.

“Ho karteira professional ne’e atu motiva jornalista sira halo sira nia servisu ho responsabilidade liutan,”Michaela akresenta. 

Durante sosiálizasaun, Diretór Diresaun Apoiu Jurídiku no Liberdade Imprensa (DAJLI), Olderiku da Kosta esplika kona-ba lala’ok lei komunikasaun sosiál, entretantu afisiál DAJLI, Antonito Baptista esplika kona-ba regulamentu sira ne’ebé CI aprova ona.

Depois remata esplikasaun regulamentu sira, iha sesaun diskusaun mosu lamentasaun balun katak mídia dala barak hato’o informasaun la tuir saida mak fontes koalia. Alende ne’e sira lamenta mídia públiku asuntu barak kobre de’it iha kapitál Díli no la halo kobertura to’o ba munisípiu, postu administrativu, suku no área rural.

Partisipa iha Sosiálizasaun ne’e, Segundu Komandante Polísia Munisípiu Ermera Superintendente Assistente, Raimundo de Araujo, Xefe suku sira, Jornalista husi Rádiu Komunidade no representante sira seluk hamutuk ema 30 resin. CI