Liberdade Imprensa Bele Transforma Dezenvolvimentu iha País
Diretór DCSRIC, Altino Freita (Karuk), Adminitradór Munisípiu Ainaro, Albertino de Araújo (Klaran) no Diretór DAJLI, Olderiku da Kosta (Los), halo abertura ba sosializasaun Lei KomSos no Regulamentu CI nian iha Salaun Munisípiu Ainaro. Foto: CI/Efrem

Liberdade Imprensa Bele Transforma Dezenvolvimentu iha País

Atividade Hare nain: 9474

Ainaro – Administradór Munisípiu Ainaro, Albertino de Araújo, hatete liberdade Imprensa maka bele transforma progresu dezenvolvimentu husi kualker sektores iha Timor-Leste.

“Liberdade Imprensa oinsá presta sira nia funsaun iha mídia hodi transforma informasaun ba iha progresu hotu-hotu tantu dezenvolvimentu fíziku, sosiál no sósiu kulturál,” Albertino hato’o kestaun ne’e iha abertura sosializasaun lei komunikasaun sosiál no regulamentu sira Conselho de Imprensa de Timor-Leste (CI) nian, iha salaun Administrasaun Munisípiu Ainaro, Sesta-Feira, 22/09/2017.

Albertino de Araujo, dehan jornalista sira presiza duni liberdade ida atu bele hala’o serbisu ho profesionalizmu ba transforma informasaun ba públiku. Tanba ne’e, sosializasaun lei Komunikasaun sosiál no regulamentu sira CI nian importante tebes ba autoridade sira iha munisípiu Ainaro atu hatene no komprende knar jornalista, mídia inklui knar órgaun no meiu komunikasaun sira.

“Sensebilizasaun ida ne’e importante atu ita bele adapta, liu-liu ba joven sira ne’e haknaar-án iha Imprensa sira públiku nian,” Administradór ne’e akresenta, Munisípiu Ainaro rasik oras ne’e dadaun iha ona rádiu komunidade rua hanesan Rádiu Komunidade Lian Tatamailau no Rádio Komunidade Mau-loko.

Iha sorin seluk, Reprezentante Prezidente CI, Atuál Diretór Komunikasaun Sosiál, Relasaun Institusional no Kooperasaun CI (DCSRIC), Altino da Cruz  Freitas, iha abertura hato’o agradese wa’in ba administradór munisípiu Ainaro no partisipantes sira tanba bele hola parte mós iha sosializasaun CI nian. 

“Ho ita nia serbisu hamutuk, kontribuisaun, kooperasaun, bele kontribui ba prosesu harii no dezenvolve ita nia nasaun ida ne’e,” Altino esplika.

Iha sosializasaun ne’e, partisipantes husi Diresaun Agrikultura no Peskas Munisipio Ainaro, Oscar Araujo Quintão, kestiona kona-ba serbisu jornalista sira nian ne’ebé la halo kobertura to’o ba área rural hodi halibur problemas no progresu hotu ne’ebé oras ne’e dadaun la’o iha base.

Iha parte seluk mós, representante husi Diresaun Meiu Ambiente Munisipio Ainaro, Veriatu Amaral, kestiona kona-ba tratamentu ba jornalista ladun di’ak hanesan fasilidade, saláriu, nst liu-liu atensaun ba jornalista hirak ne’ebé servisu iha mídia privadu sira. Nia rekomenda ba CI fo atensaun ba asuntu ne’e tanba fó impaktu tebes ba jornalista sira nia nesesidade moris lorloron. Tuir nia CI mós tenki hala’o sosializasaun hanesan to’o ba suku no aldeia sira nune’e povu bele komprende no hatene jornalista sira nia servisu.

Preukupasaun seluk ne’ebé partisipantes sira hato’o iha sosializasaun ne’e mak hanesan, notisia balun la iha balansu, presija lei atu kontrola utilizasaun facebook, knar jornalista, independensia Conselho de Imprensa no rekomendasaun sira seluk.

Hatan ba preokupasaun hirak ne’e, representante Prezidente Conselho de Imprensa, Altino da Cruz Freitas, esplika jornalista sira barak seidauk halo kobertura to’o iha baze tanba depende ba kapasidade rekursus umanus no rekursu finanseiru iha kada instituisaun mídia sira, maibe atu solusiona situasaun ne’e persija mos politika no gestaun ne’ebé diak husi kada instituisaun mídia.

Kona-ba sosializasaun hanesan tenke to’o báze, Diretór DCSRIC, Altino hatete dadaun ne’e, CI seidauk bele sosiliza to’o ba nivel postu Administrativu, Suku no Aldeia tanba orsamentu CI nian ba tinan ida ne’e la aloka ba to’o báze, espera katak iha tempu ruma CI sei hala’o sosializasaun to’o báze.

Hatan kona-ba oinsa Conselho de Imprensa bele hala’o servisu ho independenti tamba hetan orsamentu husi estadu, Diretór Diresaun Apoiu Jurídiku no Liberdade Imprensa CI (DAJLI), Olderiku da Kosta, esplika katak maske atividade CI finansia husi Orsamentu Geral Estadu, maibe tuir artigu 48 husi lei Komunikasaun Sosiál número 5 / 2014 hatete, orsamentu ne’ebé fo, labele afeta ba independénsia Conselho de Imprensa nian. 

Partisipa mos iha Sosializasaun ne’e, Komandante Polisia Munisipio Ainaro,  reprezentante F-FDTL, Administrador Postu Administrativu sira, Konsellu Veteranu, Diretores interministerial iha Administrasaun munisipio, sosiedade sivíl, Rádiu komunidade Ainaro no Maubesi inklui konvidadu sira seluk. (CI)