Reprezentante komunidade no autoridade lokál Postu Administrativu Fatumea, Teodomiru Amaral de Araújo, hato’o preukupasaun ne’e durante sosializasaun lei Komunikasaun Sosiál no Regulamentu Conselho de Imprensa de Timor – Leste (CI), iha salaun enkontru Administrasaun Munisípiu Cobalima, Kinta – Feira, 21 /09/ 2017.
Nia hatete, durante tinan barak populasaun iha Fatumea hetan de’it asesu informasaun no programa hosi Rádiu Lokál Atambua iha Timor Osidentál Indonézia, tamba ne’e nia parte rekomenda ba Conselho de Imprensa atu hatutan asuntu ne’e ba nasionál, hodi oinsá bele buka solusaun. “Kuandu komunidade sira loke Rádiu ne’e sira, ne’e sira kapta liu mak Rádiu Indonézia nian – Atambua, tamba ne’e iha oportunidade ida ne’e ha’u hato’o de’it atu ita hare kondisaun ida ne’e”.
Teodomiru Amaral de Araujo, reforsa katak asuntu ne’e aprezenta ona iha enkontru ne’ebé antes ne’e hala’o iha kapitál Munisípiu Cobalima inklui wainhira autoridade iha nasional sira mai hala’o enkontru ka vizita iha Munisípiu Cobalima, maibé seidauk iha rezultadu.
Tempu hanesan, Administradór interinu Munisípiu Cobalima, Jacinto do Santos, hatete frekuensia Rádiu hosi Atambua (Indonézia) la’ós ema rona de’it iha área Postu Administrativu Fatumea maibé inklui mós área seluk ne’ebé pertensia ba Munisípiu Cobalima.
“Atu rekomenda de’it ba Reprezentante Prezidente Conselho de Imprensa kona-ba povu nia sujestaun ida hosi povu Postu Administrativu Fatumea. Hakarak hato’o tan katak, frekuensia Rádiu Indonézia ninian ne’ebé mak oras ne’e dadaun perkore iha Postu Administrativu Fatumea, tuir sira nia reprezentante hato’o de’it, maibé tuir ami nia hatene katak, frekuensia Rádiu Indonézia nian la’ós de’it iha fronteira mai mós iha mós Munisípiu Laran tomak liu-liu Suai ne’e, iha Suai ne’e dalaruma kaptura frekuensia hosi Rádiu Atambua”.
Hatan ba ne’e reprezentante Prezidente Conselho de Imprensa de Timor-Leste, aktual Diretór Diresaun Komunikasaun Sosiál, Relasaun Institusionál no Kooperasaun CI, Altino da Cruz Freitas, hatete, CI sei hato’o rekomendasaun ne’e ba orgaun estadu ne’ebé relevante atu konsidera, tamba knaar Conselho de Imprensa nian ida mak oinsá atu bele garantia públiku ninia direitu atu hetan informasaun liu hosi meius komunikasaun sosiál iha rai laran. “ Knaar Conselho de Imprensa nian ida mak atu oinsá garantia povu nia dirreitu, públiku nia direitu atu hetan informasaun, tamba ne’e rekomendasaun ne’e sai mós ajenda imporante ida ba Conselho de Imprensa atu hato’o ba RTTL,EP no institusaun relevante sira seluk atu toma konsiderasaun”. (CI)