Díli – Ministru Prezidensia Konsellu Ministru (MPCM), Adriano do Nascimento, hala’o vizita kortezia ba Conselho de Imprensa de Timor-Leste (CI) hodi observa no hare besik serbisu CI nian.
Iha vizita ne’e, MPCM hato’o mensajen katak CI hola papél importante tebes atu tau matan ba meius no órgaun komunikasaun sosiál sira iha Timor-Leste, tanba mídia ne’e bele hatun ka hasa’e ema ka instituisaun ida iha minutu balun nia laran de’it.
“Iha fatin ida ne’ebé ha’u halo knar ba, nia papaél ida maka atu promove ou konsolida imajen estadu. Iha kontestu ida ne’e hatúr-án iha kontestu estadu maka mídia nia papél oinsá maka bele manán ema nia pensamentu nune’e ita mós bele motiva sira nia asaun para bele hola parte ativu iha prosesu rekonstrusaun prosesu dezenvolvimentu nasionál,” dehan Adriano iha vizita ba dala uluk mai CI, Segunda-Feira (18/08/2017), iha Quintal Boot, Díli.
Iha biban ne’e, Ministru Adriano, enkoraja dirijentes no funsionáriu tomak CI nian atu nafatin serbisu ho vontade tomak, serbisu ho profesionalizmu hodi disemina informasaun ba públiku.
Entretantu, Diretora Ezekutiva CI, Ana Teresa Sequiera esplika misaun no vizaun CI nian inklui introdus planu no funsionáriu tomak ba MPCM.
Aproveita okaziaun ne’e, Diretora husu atu bainhira CI kria dekretu lei ruma bazeia mandatu lei komunikasaun sosiál, MPCM toma konsiderasaun ba dekretu lei no regulamentu sira ba rádiu komunidade ne’ebé sei haruka ba konsellu ministru atu diskuti.
“Ami iha planu tinan oin atu prepara esbosu dekretu lei ruma ne’ebé mandatu hosi lei komuniasaun sosiál ami tenke halo, hanesan mensiona de’it aban bainrua hato’o ami nia proposta ba karik ajuda hela hare no bele fasilita lalais liutan,” Ana esplika.
Diretora hatutan dekretu lei hirak ne’e ho regulamentu sira ne’e presiza duni tanba CI hakarak atu asegura serbisu jornalista sira nian inklui funsionamentu rádiu komunidade sira.
Alein de ne’e, DE mós akresenta katak rádiu komunidade sira mós oras ne’e seidauk iha regulamentu ida ba sira maske hola papél nu’udar jornalista ne’ebé serbisu iha komunidade nia leet maibé laia lei ida ba sira.
Hatan ba kestaun sira ne’e, MPCM Adriano dehan “Ita boot sira maka hatene liu enkuadramentu legál atu fasilita lalais, ita boot sira ne’e funsionáriu estadu tanba ne’e oinsá bele profesionaliza imi nia-án no profesionaliza estadu ida ne’e atu sai hanesan instituisaun estadu ida ne’ebé di’ak liu”.
Vizita MPCM, Adriano do Nascimento hafoin simu pose iha loron 15/09/2017, iha palásiu Nobre, Lahane, Díli, ne’ebé hola parte mós iha estrutura membru VII Governu Konstitusionál iha mandatu tinan lima (5) hosi 2017-2022. (CI)