Manatuto – Conselho de Imprensa de Timor-Leste (CI) hala’o Sosializasaun Lei Komunikasaun Sosiál no Regulamentu sira CI nian, iha parte leste hahú hosi Mmunisípiu Viqueque, Baucau, Lautem no ramata iha Munisipio Manatuto la’o ho susesu, tanba hetan partisipasaun másimu hosi representante mídia no lideransa lokal sira.
Iha Abertura Sosializasaun loron ikus iha Mmunisípiu Manatuto sexta-feira (15/09/2017), Administradór Postu Administrativu Manatuto Vila, Gaspar Henrique da Silva hateten, lei komunikasaun sosiál bele tulun jornalista no sidadaun hotu atu bele serbisu hamutuk ba dezenvolve ita nia país.
“Hanesan nasaun soberanu presiza lei no enkuadramentu legál sira seluk, situasaun sira ne’ebé mak Jornalista sira hasoru, presiza duni halo sosializasaun, espera bele fó hanoin no ideias balun ba profesionalízmu servisu Jornalista. Alein tulun Jornalista, tulun mós sidadaun sira oinsá atu bele servisu hamutuk,” dehan Gaspar.
Antes ne’e, iha loron 12-14 Setembru, CI mos hala’o sosializasaun ba lei komunikasaun sosiál no regulamentu sira iha munisípiu tolu (3) hanesan Viqueque, Baucau no Munisipio Lautem ne’ebé la’o ho di’ak.
Iha biban referee, Prezidente Conselho Veteranus Munisípiu Manatuto, Candi Maubere Soares, hatete buat ne’ebé importante ba ita hotu mak iha sorumutu refere bele halo loos interpretasaun sira ba serbisu jornalízmu nian ne’ebé durante ne’e públiku kestiona.
Entretantu Xefe Suku Ma’abat, Antonio da Silva, husu sobre papél Jornalista, oinsá ho direitu sidadaun sira ne’ebé fo informasaun nomós bainhira mídia halo kobertura maibé tenke selu. Estudante UNTL, Apolonariu da Cruz, kestiona ema iha area rural susar atu fo informasaun ba mídia tanba mídia la kobre to’o area rural.
Antonio Filo, Prezidente Board Radio Komunidade Manatuto, kestiona kona-ba, “esplikasaun sira iha regulamentu la ko’alia kona-ba Rádiu Komunidade, husu mós CI atu kria kondisaun ba distribuisaun mídia imprime sira atu bele to’o iha área remota.
Konselleiru CI, Francisco Belo, dehan direitu públiku ba hetan no hato’o informasaun garantia iha Konstituisaun RDTL. Entretantu kona-ba área kobertura mídia imprime sira ne’ebé nia distribuisaun la to’o Munisipiu sira tamba kondisaun ne’ebé difikulta mak orsamentu husi kada instituisaun mídia.
Konsilleiru esplika mós saída mak mídia profesional no sé mak iha kompeténsia ba kontrollu sosiál mídia hanesan facebook, notísia ka informasaun sira iha mídia.
Diretora Ezekutiva Conselho Imprensa, Ana Teresa Sequeira, esplika seidauk iha regulamentu ruma ne’ebé ko’alia espesífika kona-ba Rádiu Komunidade no dadauk Conselho de Imprensa esforsu atu hare ba kestaun ne’e.
Sosializasaun ne’ebé hala’o iha salaun Administrasaun Munisípiu Manatuto ne’e partisipa ho totál ema 73, feto 18 no mane 55 kompostu husi Autoridade lokál, Sosiedade sivíl, Jornalista husi Rádiu Komunidade no RTL.e.P, Estudante Universitáriu no Sekundáriu sira. (CI)