Lospalos - “Mídia nu’udar lian ba ema ne’ebé laiha lian, nune’e sosializasaun Lei Komunikasaun Sosiál (KomSos) no Regulamentu Conselho de Imprensa de Timor-Leste (CI) importante ba hatene knaar mídia.”
Lia hirak ne’e hato’o hosi Administradór Interinu Munisípiu Lautem, Jacinto da Costa, iha abertura sosializasaun Lei KomSos no regulamentu sira CI nian, iha salaun Administrasaun Munisípiu Lautem, Kinta-Feira, 14/09/2017.
Jacinto agradese ba prezensa CI nomós partisipantes sira iha programa sosializasaun tanba mídia nudar pilar importante hodi hatutan povu nia matan, eduka no dezenvolve país nune’e ema hotu tenke fó importansia ba mídia nia serbisu.
“Laiha Lei no Regulamentu, mídia la’ós konstrui maibé destroi, tanba ne’e presiza regulamentu iha hala’o knar no sira nia devér, nune’e espera ita hotu bele partisipa di’ak iha Sosializasaun ne’e,” espera Jacinto da Costa.
Konsilleiru CI, Francisco Belo, iha nia diskursu esplika Lei nú. 25/2015, nu’udar báze ba CI nia estabelesementu hodi promove liberdade imprensa no liberdade espresaun iha Timor-Leste.
Iha sesaun diskusaun, partisipantes sira kestiona kona-ba profesionalismu servisu mídia nian liuhosi liafuan no imajen sira ne’ebé la apar ho kondisaun real ka la tuir Timor-Leste nia kultura. Kestiona mós kona-ba oinsá mós CI define di’ak mídia professional sira wainhira CI hahú halo rejistu ba órgaun no meiu komunikasaun sosiál sira.
Diretora Ezekutiva Conselho de Imprensa, Ana Teresa Sequeira, esplika sobre servisu hosi kada diresaun Conselho Imprensa nian bainhira halo monitorizasaun ba obra no servisu mídia nian inklui atende keixa sira ligadu ho servisu mídia nian.
Regulamentu sira Conselho de Imprensa nian maka hanesan kódigu étika jornalístika, prosedimentu ba ezersisiu direitu hatan no ratifikasaun, karteira professional jornalístika nian, prosedimentu dixiplinar hasoru jornalista no publikasaun sira, regra ba aplika ezame final estájiu no identifikasaun ejaminadór, rejistu orgaun no meius komunikasaun sosiál sira inklui prosedimentu mediasaun.
Entretantu lei Komunikasaun Sosiál nú. 5/2014, loron 19, fulan Novembru, nu’udár lei dahuluk Timor-Leste hodi garante no promove Liberdade Imprensa no Liberdade Espresaun ne’ebé konsagra ona iha Konstituisaun RDTL artigu 40 no 41.
Total partisipantes iha Sosializasaun ne’e hamutuk ema nain 28, feto 7 no mane 21 kompostu husi autoridade lokál PNTL, responsavel mídia inklui jornalista Rádiu Komunidade Lospalos, Vox Populi no Jornalista korrespondente RTTL.e.P. (CI)