Atividade

CI Koopera ho Rádiu Komunidade sira ba Sosializasaun Lei Komunikasaun Sosiál no Regulamentu sira CI Nian

CI Koopera ho Rádiu Komunidade sira ba Sosializasaun Lei Komunikasaun Sosiál no Regulamentu sira CI Nian

Conselho de Imprensa de Timor-Leste (CI) hala’o enkontru ho Responsavel no Jestór Rádiu Komunidade sira hosi Munisípiu 11 no Rejiaun Autónomu Espesiál Oecusse-Ambeno nu’udar fáze preparasaun ba sosializasaun Lei KOMSOS no Regulamentu CI nian.

Enkontru ne’ebé hala’o iha loron  4/9/2017, iha salaun Plenária CI ne’e loke hosi Diretora Ezekutiva CI, Ana Teresa Sequeira.

“Conselho Imprensa hamriik ho nia mandatu atu promove liberdade imprensa no liberdade espresaun, iha servisu ne’ebé atu halo la’os de’it iha nasionál maibé mós iha munisípiu sira, nune’e ita boot nia kontribuisaun no prezensa iha munisípiu sei ajuda Conselho Imprensa nia servisu to’o iha baze,” esplika Diretora Ezekutiva Conselho de Imprensa.

Ana Teresa Sequeira hatutan, enkontru ne’e atu introdus objetivu, tarzetu audens nomós kalendáriu implementasaun programa refere, “ami konvida ita boot sira mai atu introdus programa refere, tamba ne’e husu kolaborasaun hosi ita boot sira atu apoiu programa ne’e bele ba to’o iha Munisípiu ne’eba. Programa ne’e atu asegura ita nia pesoál mídia sira halo servisu livre liu iha baze, atu ema bele kompriende liu ita nia knaar, hodi fó espasu ba ita atu servisu ho di’ak.”

Iha fatin hanesan, Diretór Diresaun Apoiu Jurídiku no Liberdade Imprensa (DAJLI), Olderiku Araujo da Kosta, aprezenta planu sosializasaun lei komunikasaun sosiál no regulamentu sira CI nian.

Iha sorumutu ne’e, Jestór Rádiu Komunidade sira hato’o sira nia preokupasaun no rekomendasaun sira sobre planu implementasaun atividade sosializasaun ne’e no hetan sosulasaun ba rekomendasaun hirak ne’e iha sesaun diskusaun.

Sosializasaun lei Komsos no regulamentu sira CI nian ne’e sei hahú hala’o hosi loron 12 setembru to’o 18 Outubru tinan ne’e iha munisípiu sira, enkuantu iha kapital Díli realiza ona iha loron 23 fulan Agostu 2017. (CI)